"Fənərbaxça"da prezident seçkilərində qalib gələn Aziz Yıldırımın klubla bağlı əsas hədəfləri ortaya çıxıb. İddialara görə, yeni rəhbərlik həm idman, həm də infrastruktur sahəsində genişmiqyaslı dəyişikliklərə hazırlaşır.
Prezident seçkilərində 17 min 245 səs toplayaraq yenidən klub rəhbərliyinə qayıdan Aziz Yıldırımın ilk addımlarından biri idarəetmə strukturunu formalaşdırmaq olacaq. Məlumata görə, Mahmut Uslu mətbuat məsələlərinə, Barış Göktürk futbol şöbəsinə, Ömer Onan basketbol bölməsinə, Nihat Özbağı isə stadion layihəsinə cavabdeh olacaq.
Klubda ən çox müzakirə olunan məsələlərdən biri baş məşqçi seçimidir. İddialara əsasən, Aykut Kocamanın komandanın sükanı arxasına keçməsi gözlənilir.
Bundan başqa, məşqçilər korpusunda Volkan Demirel, Dirk Kuyt, Selçuk Şahin və Martin Skrtel kimi tanınmış simaların yer alacağı bildirilir.
Yeni rəhbərliyin transfer bazarında da fəal olacağı vurğulanır. Mətbuatda yayılan xəbərlərə görə, Vedat Muriqi və Serhou Guirassy transferlərində müəyyən irəliləyiş əldə olunub.
Bununla yanaşı, müdafiənin mərkəzi, sağ cinah müdafiəsi və hücum cinahı mövqelərinə də yeni futbolçuların cəlb edilməsi planlaşdırılır. Klubun yay transfer dövründə ən azı 5 yeni oyunçu transfer etmək istədiyi qeyd olunur.
Məlumata görə, "Fənərbaxça" rəhbərliyi Türkiyə futbolunda tətbiq olunan 10+4 legioner qaydasının dəyişdirilməsi istiqamətində təşəbbüs göstərməyə hazırlaşır.
Eyni zamanda, seçki kampaniyası dövründə açıqlanan stadionun tutumunun artırılması layihəsi də gündəmdə qalır. Rəhbərlik lazımi icazələri aldıqdan sonra yeni tribunal və VIP lojalarla bağlı layihələri həyata keçirməyi planlaşdırır.
Qeyd edək ki, xəbərdə yer alan məlumatların əksəriyyəti Türkiyə mətbuatında yayılan iddialara əsaslanır və klub tərəfindən rəsmi şəkildə təsdiqlənməyib.
