ABŞ–İsrail və İran arasında davam edən müharibə artıq 20-ci gününə daxil olub. Tərəflər arasında qarşılıqlı hücumlar genişlənərək regiondakı enerji infrastrukturunu hədəfə alıb. Referans Media xəbər verir ki, ABŞ və İsrail qüvvələrinin İranın böyük neft və qaz obyektlərini vurmasından sonra Tehran Səudiyyə Ərəbistanı, Qətər və Birləşmiş Ərəb Əmirliklərində yerləşən enerji obyektlərinə raket və pilotsuz uçuş aparatları ilə zərbələr endirib.
İranın ən böyük qaz bölgəsi hədəf alındı
ABŞ və İsrail qüvvələri İranın Buşəhr vilayətinin Asaluye şəhərində yerləşən bir neçə neft emalı zavodunu və dünyanın ən böyük qaz yataqlarından biri hesab olunan Cənub Pars qaz yatağını vurub. Hücum nəticəsində Asaluye şəhərində üçüncü, dördüncü, beşinci və altıncı neft emalı zavodları zərər görüb, ərazidə güclü yanğın baş verib. Həmçinin qaz yatağının üçüncü və altıncı fazalarının da hücuma məruz qaldığı bildirilib. İran rəsmiləri yanğının sonradan nəzarət altına alındığını açıqlayıb.
Tehran 3 ölkədə enerji obyektlərini vurdu
Bu hücumlara cavab olaraq İran Körfəz regionundakı enerji infrastrukturlarını hədəfə alıb. Qətərin milli enerji şirkəti ölkənin ən böyük sənaye zonalarından biri olan Ras Laffan Sənaye Bölgəsinin ballistik raketlərlə vurulduğunu və ərazidə ciddi dağıntıların baş verdiyini açıqlayıb. Yanğın mülki müdafiə qüvvələrinin müdaxiləsindən sonra söndürülüb. Qətər əmiri Şeyx Təmim bin Həməd Al Sani hücumu sərt şəkildə pisləyərək bunun ölkənin milli təhlükəsizliyinə birbaşa təhdid olduğunu bildirib.
İranın hücumlarının digər hədəfi Səudiyyə Ərəbistanının paytaxtı Riyad olub. Səudiyyə Ərəbistanı Müdafiə Nazirliyi şəhərin 4 ballistik raketlə vurulduğunu, lakin hava hücumundan müdafiə sistemlərinin onların hamısını məhv etdiyini açıqlayıb. Buna baxmayaraq, raket qalıqlarının şəhərin bəzi bölgələrinə düşməsi nəticəsində yanğın baş verib və yaralananların olduğu bildirilib.
BƏƏ-də qaz və neft obyektləri hədəf alındı
İranın raket və dron hücumları Birləşmiş Ərəb Əmirliklərində də qeydə alınıb. Rəsmi məlumatlara görə, Habşan qaz emalı kompleksi və Bab neft yatağı hədəfə alınsa da, əksər raketlər hava hücumundan müdafiə sistemləri tərəfindən məhv edilib. Rəsmi açıqlamaya əsasən, hadisə nəticəsində xəsarət alan olmayıb, lakin təhlükəsizlik tədbirləri çərçivəsində qaz obyektlərinin fəaliyyəti müvəqqəti dayandırılıb.
İsrailə raket hücumu: bir nəfər öldü
İran eyni zamanda İsrail ərazisini də raketlərlə vurmağa davam edir. İsrailin mərkəzində yerləşən Moshav Adanim yaşayış məntəqəsinə ballistik raket hücumu nəticəsində bir işçi həyatını itirib.
İranın yüksək vəzifəli rəsmiləri öldürüldü
İsrail tərəfi İranın kəşfiyyat naziri İsmayıl Hatibin hava zərbəsi nəticəsində öldürüldüyünü açıqlayıb. İsrail müdafiə naziri İsrail Katz əməliyyatın gecə saatlarında həyata keçirildiyini bildirib. İran prezidenti Məsud Pezeşkian isə Hatibin ölümünü təsdiqləyərək hadisəni “sui-qəsd” adlandırıb.
Müharibənin itkiləri artır
Məlumatlara görə, fevralın 28-dən bəri davam edən hücumlar nəticəsində İran ərazisində aralarında yüksək rütbəli hərbi və siyasi şəxslərin də olduğu təxminən 1300 nəfər həyatını itirib. İran isə cavab olaraq İsrailə və bölgədə ABŞ hərbi bazalarına ev sahibliyi edən ölkələrə raket və pilotsuz uçuş aparatları ilə hücumlar həyata keçirir.
Yaxın Şərqdə gərginlik sürətlə artır və enerji obyektlərinin hədəfə alınması müharibənin regional miqyasının daha da genişlənə biləcəyi ehtimalını gücləndirir.
