Manisa bölgəsində yerləşən Demirköprü su anbarında su səviyyəsinin kritik həddə çatması səbəbindən mühüm qərar qəbul edilib. Uzun illərdən sonra ilk dəfə olaraq bənddən Mərmərə Gölünə nəzarətli şəkildə su ötürülməsinə başlanacaq.
Referans Media xəbər verir ki, Türkiyədə son aylarda müşahidə olunan güclü yağışlar nəticəsində bəndlərdə doluluq səviyyəsi əhəmiyyətli dərəcədə artıb. Manisa Valiliyinin yaydığı məlumata görə, 2026-cı ildə yağıntıların normadan yüksək olması Demirköprü su anbarında uzun illərdir görünməyən su ehtiyatının yaranmasına səbəb olub.
Hazırda Salihli, Saruhanlı və Gölmərmərə rayonlarının sərhədlərində yerləşən Mərmərə gölündə son yağışlardan sonra yenidən su səthinin formalaşdığı bildirilib. Qurumlar gölün tamamilə canlandırılması üçün əlavə tədbirlərin həyata keçirildiyini açıqlayıb.
Planlamaya əsasən, yay suvarma mövsümü başlamazdan əvvəl Demirköprü su anbarından Mərmərə gölünə su buraxılacaq. Məqsəd həm mümkün daşqın riskinin qarşısını almaq, həm də uzun müddətdir quruma təhlükəsi ilə üzləşən gölü yenidən dirçəltməkdir.
Məlumata görə, Dövlət Su İşləri tərəfindən Bozdağ bölgəsindən gələn çay və dərələrin də gölə yönləndirilməsi ilə bağlı araşdırmalar davam etdirilir.
Vahdettin Özkan bildirib ki, qlobal istiləşmə və quraqlığın təsirləri bölgədə ciddi hiss olunur. Onun sözlərinə görə, Mərmərə gölü həm kənd təsərrüfatı, həm ekosistem, həm də yerli əhali üçün həyati əhəmiyyət daşıyır.
Vali qeyd edib ki, 21 may 2026-cı ildən etibarən başlanacaq su ötürülməsi ilə gölün yenidən əvvəlki vəziyyətinə qayıtması və fermerlər üçün məhsuldar suvarma mövsümünün yaranması gözlənilir.
