İngiltərədə hökumət uşaqları passiv siqaret tüstüsündən və elektron siqaret buxarının zərərlərindən qorumaq üçün yeni məhdudiyyətlər hazırlayır. Plan qəbul olunarsa, içində 18 yaşdan kiçik uşaq olan şəxsi avtomobillərdə elektron siqaret istifadəsi tam qadağan ediləcək.
Səhiyyə Nazirliyinin təqdim etdiyi və hazırda müzakirə mərhələsində olan təşəbbüs “tüstüsüz mühit” qaydalarını genişləndirərək adi siqaretlə yanaşı elektron siqaret və qızdırılan tütün məmulatlarını da əhatə edəcək. Uşaq meydançaları və məktəb ətraflarında da bu məhsulların istifadəsi qadağan olunacaq.
Xəstəxana həyətlərində siqaret çəkmək qadağan ediləcək, lakin siqareti tərgitməyə çalışanlar üçün elektron siqaretə icazə veriləcək. Bar və restoranların açıq sahələri ilə çimərliklər isə qadağadan kənarda qalacaq.
Rəsmilər bildirirlər ki, məqsəd uşaqları və həssas qrupları qorumaq, həmçinin səhiyyə sisteminə düşən yükü azaltmaqdır.
