Türkiyə İsrailin Şərqi Qüdsdəki Əl-Əqsa məscidini bağlamasını və müsəlmanların orada namaz qılmasına mane olmasını pisləyib.
Referans Media xəbər verir ki, bu barədə AK Partiyanın sədr müavini və partiya sözçüsü Ömər Çelik bəyanat yayıb.
“İsrailin Əl-Əqsa məscidinə qarşı hörmətsizliyi bütün insanlıq dəyərlərinə qarşı yeni hücumdur. Müsəlmanların Əl-Əqsa məscidində namaz qılmasına mane olmaq barbarlıqdır. İsrail bir daha beynəlxalq hüququ pozur. Bəşəriyyət dəyərlərini qorumaq üçün bütün dünya İsrailin qanunsuz hərəkətlərinə qarşı birlikdə mübarizə aparmalıdır”, – deyə o vurğulayıb.
Qeyd edək ki, İsrail İrana qarşı hücumların başlamasından sonra tətbiq edilən məhdudiyyətlərin bir hissəsi olaraq, Əl-Əqsa məscidi də daxil olmaqla, Qüdsün Köhnə şəhərindəki müqəddəs yerlərə ibadət və ya ziyarət məqsədləri ilə girişə icazə verilməyəcəyini bəyan edib.
