Ukrayna, Rusiyadakı Taman neft terminalı və Permdəki kimya müəssisəsinə PUA hücumları həyata keçirib.
Referans Media xəbər verir ki, bu əməliyyatlar, zərərin miqyasından asılı olaraq qlobal neft bazarlarında risk mükafatının artması və qısamüddətli qiymət dəyişkənliyi ilə bağlı gözləntiləri artırıb.
Ukrayna Təhlükəsizlik Xidməti bildirib ki, Taman neft terminalı və Perm bölgəsindəki kimya fabrikinə insansız hava vasitələri ilə hücumlar edilib.
Taman terminalına bu, ikinci hücumdur. Terminal, Rusiyanın cənubunda Qara dənizə çıxan əsas ixrac nöqtələrindən biri olaraq xam neft və neft məhsullarının daşınmasında kritik rol oynayır.
Permdəki kimya fabriki isə Rusiyanın petrokimya və neft emalı infrastrukturunda strateji əhəmiyyətə malikdir.
Ekspertlər bildirir ki, neft qiymətlərinə təsir terminal və fabrikin zədələnmə səviyyəsindən asılı olacaq. Əgər Taman terminalında ixracı dayandıracaq qədər zərər baş veribsə, qlobal təklifdə qısa müddətli daralma baş verə bilər və bu da qiymətləri yüksəldə bilər.
Hələlik əməliyyatların nə qədər davam edəcəyi və istehsal gücü itkisi barədə məlumat yoxdur. Lakin hücumlar sistematik hala gəlsə və ya Rusiyanın enerji ixracında əhəmiyyətli azalma olarsa, neft qiymətlərində daha sərt dalğalanmalar gözlənilir.
Geosiyasət risklərin artması, xüsusilə Qara Dəniz enerji marşrutunda təhlükəsizlik narahatlıqlarını artırır və bazarlarda risk mükafatını yüksəldir.
