Müasir dövrdə insanların vaxt qazanmaq məqsədilə tez-tez istifadə etdiyi məişət texnikalarından biri mikrodalğalı sobadır. Yeməklərin bir neçə dəqiqə ərzində qızdırılması rahatlıq yaratsa da, mütəxəssislər bu cihazdan düzgün istifadə olunmadıqda müəyyən sağlamlıq və təhlükəsizlik risklərinin meydana çıxa biləcəyini bildirirlər.
Referans Media xəbər verir ki, məlumata görə, mikrodalğalı sobada yeməklər hər zaman bərabər şəkildə qızdırılmır.
Bu xüsusilə ət, toyuq və süd məhsullarında təhlükə yarada bilər. Qidanın bəzi hissələrinin kifayət qədər isinməməsi bakteriyaların tam məhv olmamasına səbəb olur ki, bu da sonradan qida zəhərlənməsi riskini artırır. Mütəxəssislər yeməklərin qızdırılma zamanı qarışdırılmasını və temperaturun tam yoxlanılmasını tövsiyə edirlər.
Digər ciddi risk isə plastik qablarla bağlıdır. Bir çox insan yeməyi mikrodalğalı sobada qızdırarkən uyğun olmayan plastik qablardan istifadə edir. Qida üçün nəzərdə tutulmayan plastiklər yüksək temperaturun təsiri ilə zərərli kimyəvi maddələr ifraz edə bilər. Bu maddələrin uzun müddət orqanizmə daxil olması hormonal pozuntular və digər sağlamlıq problemləri ilə əlaqələndirilib.
Araşdırmalar göstərib ki, mikrodalğalı sobada yeməklərin həddindən artıq qızdırılması qidanın tərkibindəki bəzi vitamin və mineralların azalmasına da səbəb ola bilər. Xüsusilə tərəvəzlərdə faydalı maddələrin bir hissəsi itir, bu isə qidanın qida dəyərini aşağı salır.
Bundan əlavə, təhlükəsizlik qaydalarına əməl edilməməsi məişət qəzalarına yol açır. Mikrodalğalı sobada metal qabların istifadəsi, eləcə də yumurta kimi məhsulların qızdırılması partlayış və yanğın riskini artırır. Texniki nasazlığı olan və ya köhnə sobaların istifadəsi də təhlükəli hesab olunur.
Mütəxəssislər bildiriblər ki, mikrodalğalı soba düzgün və təlimatlara uyğun istifadə edildikdə təhlükəsizdir. Lakin sürət və rahatlıq naminə istifadə qaydalarına laqeyd yanaşmaq insan sağlamlığı üçün arzuolunmaz nəticələrə səbəb ola bilər.
