Rusiyada “Apple” şirkətinin FaceTime tətbiqinə giriş bloklanıb, çünki bu tətbiq vasitəsilə cinayətlərin törədildiyi iddia olunur.
Referans Media xəbər verir ki, Rusiya İnformasiya Texnologiyaları və Kütləvi İnformasiya Vasitələrinə Nəzarət üzrə Federal Agentliyinin (Roskomnadzor) verdiyi açıqlamada, “FaceTime”da sentyabr ayından bəri yaşanan giriş problemləri ilə bağlı qiymətləndirmələr dərc edilib. Tətbiq vasitəsilə cinayətlərin törədildiyi iddia edilən bəyanatda deyilir: “FaceTime ölkədə terror fəaliyyətlərini təşkil etmək və həyata keçirmək, cinayətkarları cəlb etmək, vətəndaşlarımıza qarşı fırıldaqçılıq və digər cinayətlər törətmək üçün istifadə olunur”.
Açıqlamada qeyd olunub ki, sözügedən səbəbdən tətbiqə giriş bloklanıb.
Digər tərəfdən, Rusiyada təhlükəsizlik və fırıldaqçılığa qarşı mübarizə məqsədilə WhatsApp və Telegram vasitəsilə zənglər məhdudlaşdırılıb. Ölkədə yeni istifadəyə verilmiş yerli MAX tətbiqi, xüsusən də dövlət qurumları tərəfindən böyük rəğbət görür.
