Antalya uzun illər Rus turistlərin əsas istirahət məkanı olsa da, indi ciddi rəqabətlə üz-üzədir. Son dövrdə Vyetnam xüsusilə Nha Trang sahilləri ilə rus turistlərin yeni sevimli istirahət məkanına çevrilib.
Referans Media xəbər verir ki, artan birbaşa uçuşlar, viza prosedurlarının asanlaşdırılması və münasib qiymətlər Vyetnamı daha cəlbedici edib. Xüsusilə Nha Trang bölgəsində turist axını son aylarda kəskin şəkildə artıb.
Rəqəmlərə görə, Vyetnama gedən rus turistlərin sayı əvvəlki illərlə müqayisədə təxminən üç dəfə artaraq 690 min nəfərə çatıb.
Niyə Vyetnam seçilir?
Turistlərin Vyetnama üstünlük verməsinin əsas səbəbləri daha ucuz istirahət paketləri, viza rahatlığı, inkişaf etmiş turizm infrastrukturu, əlverişli iqlim və çimərliklərdir. Bunlar ölkəni yeni “isti dəniz tətili mərkəzinə” çevirib.
Rus turist axınının Asiyaya yönəlməsi Antalya üçün yeni rəqabət mərhələsinin başladığını göstərir. Uzun illərdir yay aylarında dolu olan Antalya sahilləri indi Vyetnamla rəqabət aparmaq məcburiyyətindədir.
Turizm mütəxəssisləri bu tendensiyanın davam edəcəyi təqdirdə regionlar arasında turist uğrunda rəqabətin daha da güclənəcəyini bildirir.
