16 iyul 2025- ci il tarixində Azərbayca Respublikasının Dövlət Miqrasiya Xidmətinin rəisi Vüsal Hüseynov öz sosial şəbəkə hesabında qeyd edib ki, bu gündən etibarən ümumvətəndaş pasportuna malik vətəndaşlarımız Çin Xalq Respublikasına, o cümlədən ÇXR-nın vətəndaşları ölkəmizə hər hansı 180 günlük dövr ərzində cəmi 90 gün olmaqla vizasız səfər edə bilərlər.
Bu tələbin sadə izahı 90 gün toplam ölkədə olduqdan sonra təkrar giriş etmək üçün növbəti 90 günün gözlənilməsidir. Ölkəyə hər girişdə maksimum olma müddəti 30 gündür. 30 gündən artıq əmək fəaliyyəti, təhsil və ya digər məqsədlə ölkədə qalmaq istəyən şəxslər müvafiq viza əldə etməklə səfər edə bilərlər. Qarşılıqlı səfərlərin xoş, uğurlu, məlumatlı, yüksək təəsüratlı olmasını diləyirik.
Viza rejminin sadələşdirilməsi Azərbaycan və Çin arasında hansı perspektivləri vəd edir? Bu qərarın əhali və iqtisadiyyatımız üçün hansı başlıca faydaları gözlənilir?
Bu mövzuyla bağlı Sosial Tədqiqatlar Mərkəzi Mətbuat xidmətinin rəhbəri, siyasi şərhçi Əziz Əlibəyli REFERANS-ın suallarını cavablandırıb. Əziz Əlibəyli bildirib ki, Çin dünyanın iqtisadi nəhəngidir və onun Azərbaycanla münasibətlərinin sabitləşdirilməsi vətəndaş gediş-gəlişlərinə görə, ticarət dövriyyəsinə maksimal təsir göstərəcək. Bu həm də onunla əlaqədardır ki, daşınmaların miqdarı artacaq. Baqaj və əl daşınmalarının kəskin şəkildə artımı müşahidə olunacaq.
Müsahibimiz onu da vurğulayıb ki, bu alış-veriş prizmasından, yəni iqtisadi hədəf təklif prizmasından çox yaxşıdır. Amma ikinci əsas məsələ turistik münasibətlərin üstə çıxarılmasıdır ki, hərhalda ilkin olaraq bir milyon Çinli turistin gəlməsi hədəflənir. Hesab edirəm ki, Azərbaycan iqtisadiyyatı üçün kifayət qədər yüksək olacaq. Yeri gəlmişkən demək olar ki, Çin bazarı qlobal bazardır və Çin bazarı bizim üçün spesifik bazardır. Bu mənada bizim qazanan tərəf olmağımız böyük bir dəyər təşkil edir. Biz buna necə baxmalıyıq? Biz buna “Bir kəmər bir yol” layihəsinin Azərbaycan hissəsi kimi.
“Çünki bu nəhəng dünya layihəsi gəlib Zəngəzurdanda keçəcək. Buna görə də əhalinin rifahı üçün hüquqi prasedurlar sadələşdirilməlidir”, – deyə Əziz Əlibəyli əlavə edib.
Ləman Xalıqova
Referans.az
