Artıq ölkəmizdə plastik cərrahiyyə sahəsində yeni mərhələ başlayır. Belə ki, Səhiyyə Nazirliyi bu sahədə klinik protokolların hazırlanmasına start verir. Məqsəd əməliyyatların daha təhlükəsiz və standartlara uyğun aparılmasıdır.
Plastik cərrahiyyə sahəsində vahid standartlar olacaq. Bu məqsədlə klinik protokollar hazırlanır…
Bu barədə Səhiyyə Nazirliyi məlumat yayıb. Bildirilib ki, sözügedən protokolların qısa müddətdə yekunlaşdırılması və təsdiq edilməsi planlaşdırılıb..
Milli Məclisin Səhiyyə Komitəsinin üzvü Pərvanə Vəliyeva Referans-a deyir ki, bu sahədə vahid standartların olmaması bəzən həm həkimlər, həm də pasiyentlər üçün risk yaratsa da, artıq bu vəziyyət dəyişir.
“Hazırda Səhiyyə Nazirliyi tərəfindən xüsusi protokol hazırlanır ki, plastik estetik cərahiyyə sahəsində hansi xüsusi göstərişlər olduğu halda əməliyyat icra edilə bilər və yaxudda ki, həmin əməliyyatların nə vaxt hansı şəraitdə pasientlərə icra olunması qeyd olunmalıdır. Cərahiyyə əməliyyatının hansı tibb mütəxəsisi tərəfindən icra olunması bu sənəddə qeyd olunacaq”.
Pərvanə Vəliyeva deyir ki, bu addım müəyyən boşluqların aradan qaldırılması ilə nəticələnəcək.
“Məsələn rinoplastika əməliyyatı həyata keçiriləcəksə, lor və ya plastik estetik cərrah tərəfindən həyata keçirilməsinin norması bu protokolda qeyd olunacaq. Ümumiyyətlə, bu cür protokolların hazırlanması plastik estetik cərahiyyə sahəsində olan hüquqi boşluqların aradan qaldırılmasına xidmət edir. Həmçinin qanuni bazanın da eyni dərəcədə gücləndirilməsi çox əhəmiyyətlidir”.
Məsələ ilə bağlı Səhiyyə Nazirliyi ilə əlaqə saxladıq. Nazirliyin Tibb Müəssisələrinin Akkreditasiyası və Keyfiyyətə Nəzarət Mərkəzindən bildirildi ki, hazırda Klinik Protokolların hazırlanması üzərində işlər aparılır. Protokolların bir qisminin cari ilin sonunadək yekunlaşdırılması və təsdiq edilməsi nəzərdə tutulub.
