Rusiya istehsalı olan populyar qida məhsulu qonşu ölkədə qara siyahıya salınıb. "Fermer" ticarət nişanı altında buraxılan qarabaşaq (qreçka) yararsız hesab edilərək Belarusda təhlükəli malların reyestrinə daxil edilib.
Referans Media xəbər verir ki, rəsmi qərara əsasən, sözügedən məhsulun ölkəyə idxalı tamamilə qadağan olunub, mağazalardakı mövcud partiyaların isə satışdan yığışdırılmasına başlanılıb.
Məhsulun qadağan edilməsinə əsas səbəb kimi keyfiyyət standartlarına cavab verməməsi göstərilib.
Belarus Dövlət Komitəsinin ekspertləri araşdırma zamanı müəyyən ediblər ki, bu markaya məxsus qarabaşağın bişmə (yumşalma) müddəti normadan xeyli çoxdur. Standartlara görə bu növ dənli bitkilər ən geci 25 dəqiqəyə bişməli olduğu halda, "Fermer" qarabaşağı 29 dəqiqəyə bişib. Texnoloji qaydaların bu cür pozulması məhsulun keyfiyyətsiz və təhlükəli sayılması üçün əsas verib.
Qeyd edək ki, sözügedən qarabaşaq növü Rusiyanın bir çox regionlarında geniş şəkildə satılır və ailələr tərəfindən gündəlik qidalanmada, o cümlədən uşaqların rasionunda aktiv istifadə olunur.
Qonşu ölkədə qoyulan bu qadağa artıq rusiyalı istehlakçılar arasında da narahatlıq və suallar doğurmağa başlayıb./Bizim.Media
