İsveçrədə əhalinin sayının 10 milyon nəfərlə məhdudlaşdırılmasını nəzərdə tutan təşəbbüslə bağlı iyunun 14-də keçiriləcək referendum öncəsi ölkədə ciddi fikir ayrılığı yaranıb.
Sağçı İsveçrə Xalq Partiyasının (SVP) dəstəklədiyi təşəbbüsə əsasən, ölkənin daimi əhalisinin 2050-ci ildən sonra 10 milyonu keçməməsi hədəflənir. Əgər əhali sayı 2050-ci ildən əvvəl 9,5 milyonu ötərsə, hökumət və parlament miqrasiyanı məhdudlaşdırmaq üçün tədbirlər görməli olacaq.
Təşəbbüsün tərəfdarları hesab edir ki, sürətli əhali artımı mənzil kirayələrinin bahalaşmasına, infrastrukturun yüklənməsinə və həyat keyfiyyətinin aşağı düşməsinə səbəb olur. Onlar miqrasiyanın daha nəzarətli şəkildə tənzimlənməsinin vacibliyini vurğulayırlar.
Əleyhdarlar isə bildirirlər ki, İsveçrədə doğum səviyyəsi aşağıdır və ölkə iqtisadiyyatının, xüsusilə səhiyyə və xidmət sektorlarının xarici işçi qüvvəsinə ehtiyacı var. Onların fikrincə, təşəbbüs qəbul edilərsə, həm əmək bazarında problemlər yarana, həm də Avropa İttifaqı ilə münasibətlər mürəkkəbləşə bilər.
Hazırda İsveçrə əhalisinin sayı təxminən 9,1 milyon nəfərdir. Sorğular referendumun nəticəsinin çox gərgin keçəcəyini və tərəflərin dəstək səviyyələrinin bir-birinə yaxın olduğunu göstərir.
