Ukrayna rəhbərliyi Türkiyənin vasitəçiliyi ilə Ukrayna və Rusiya arasında yüksək səviyyəli görüşün təşkil olunmasını istəyir.
Referans Media xəbər verir ki, Ukraynanın xarici işlər naziri Andrii Sybiha bildirib ki, ölkə prezidenti Volodymyr Zelenski Rusiyanın prezidenti Vladimir Putin ilə Türkiyədə görüşməyə hazırdır və bunun üçün rəsmi şəkildə Türkiyəyə müraciət edilib.
Sybiha Ukrayna xəbər agentliyi “Ukrinform”a açıqlamasında bildirib ki, bu təşəbbüs Antalya Diplomatiya Forumu çərçivəsində keçirilən görüşlər zamanı müzakirə olunub.
Nazirin sözlərinə görə, Ukrayna tərəfi Türkiyədən Zelenski və Putin səviyyəsində görüş təşkil etmək imkanını qiymətləndirməyi xahiş edib. Bu görüşdə Türkiyə prezidenti Rəcəb Tayyip Ərdoğan və ABŞ prezidenti Donald Trampın da iştirak etməsi ehtimal edilir.
Sybiha vurğulayıb ki, Ukrayna müharibənin dayandırılması üçün danışıqlara hazırdır və Türkiyənin vasitəçi rolunun bu prosesdə mühüm ola biləcəyinə inanır.
Nazir bildirib: “Prezident Zelenski belə bir görüşə hazırdır. Biz bu müharibəni bitirmək istəyirik və sülh prosesini sürətləndirəcək təkliflərimiz var.”
O həmçinin əlavə edib ki, hazırda əsas problem Rusiyanın prezidenti Putinin belə bir görüşə razılıq verib-verməyəcəyidir.
Sybiha Türkiyənin beynəlxalq diplomatiyada mühüm rol oynadığını qeyd edərək bildirib ki, Ankara həm açıq, həm də pərdəarxası diplomatik fəaliyyət baxımından effektiv ölkələrdən biridir.
Ukrayna tərəfi hesab edir ki, Türkiyənin vasitəçiliyi ilə keçiriləcək yüksək səviyyəli görüş illərdir davam edən müharibənin sona çatmasına töhfə verə bilər.
