Birləşmiş Millətlər Təşkilatının ( BMT ) Baş katibi Antonio Quterreş elmi məlumatların 2030-cu illərin əvvəllərində qlobal temperaturun selsi üzrə 1,5 dərəcədən çox artmasının qaçınılmaz olduğunu göstərdiyini bildirərək, bunun bütün dünyada daha çox aclığa və fəlakətə səbəb olacağı barədə xəbərdarlıq edib.
“Referans MEDİA” bildirir ki, Quterreş Braziliyanın Belem şəhərində BMT-nin İqlim Dəyişikliyi üzrə Çərçivə Konvensiyasının 30-cu Tərəflər Konfransı (COP30) çərçivəsində mətbuata müraciət edib.
Quterreş, bəzi dairələrin onilliklərdir bunu inkar etdiyini, lakin elmi məlumatların ən geci 2030-cu illərin əvvəllərində 1,5 dərəcənin üzərindəki həddindən artıq qlobal istiləşmənin qaçınılmaz olduğunu ortaya çıxardığını ifadə edərək, “Bunun nə demək olduğunu bilirik: daha çox istilik və aclıq, daha çox fəlakət və yerdəyişmə” dedi.
Ancaq indi güclü addımlar atılarsa, temperatur artımının əsrin sonuna qədər 1,5 dərəcənin altına qaytarıla biləcəyinə diqqət çəkən Quterreş, “Ancaq bu güzəşt və cəsarət tələb edir” dedi.
Quterreş, inkişaf etmiş ölkələrin iqlim dəyişikliyi ilə mübarizə üzrə öhdəliklərini yerinə yetirmə imkanlarının zaman keçdikcə azaldığını vurğulayaraq, “Dünya Belem’i izləyir. İcmalar su basmış evlərinə, uğursuz məhsullara, itirdikləri dolanışıq vasitələrinə baxır və soruşurlar: Daha nə qədər əziyyət çəkəcəyik?”
BMT: “İnsanları mənfəətdən üstün tutun”
Quterreş qlobal tullantıları azaltmaq üçün hazırkı səylərin “kafi olmadığını” bildirib və tez hərəkət etməməyin və emissiyaların əhəmiyyətli dərəcədə azaldılmasına nail olmamağın “çoxları üçün ölüm hökmü” olacağını diqqətə çatdırıb.
Quterreş iqtisadiyyatları uçucu qalıq yanacaq bazarlarından asılılıqdan qorumaq zərurətini vurğulayaraq deyib: “Doğru dəstək ilə əksər ölkələrin tullantılarını on il ərzində yarıya endirməsi, 2050-ci ilə qədər xalis sıfıra çatması və daha sonra xalis mənfiyə çevrilməsi həyati əhəmiyyət kəsb edir”.
Quterreş həmçinin bunların heç birinin “proqnozlaşdırıla bilən, əlçatan və zəmanətli maliyyələşdirmə” olmadan baş verə bilməyəcəyinə diqqət çəkərək, inkişaf etmiş ölkələrin 2035-ci ilə qədər bu sahəyə hər il ən azı 300 milyard dollar ayırmasının zəruriliyini vurğulayıb.
Ölkələri bu hədəflərdə razılığa gəlməyə çağıran Quterreş, “1,5 dərəcə sizin yeganə qırmızı xəttiniz olmalıdır. Liderlik zamanıdır. Cəsarətli olun. Elmə əməl edin. İnsanları mənfəətdən üstün tutun” deyib./Onedio.com/
Referans MEDİAXəqani Əzizli
