Güclü yağışlar Hindistanın şimalındakı Uttar-Pradeş ştatında sentyabrın 25-26-da azı 56 nəfərin ölümünə, daha 46 nəfərin isə xəsarət almasına səbəb olub.
Referans Media xəbər verir ki, bu barədə “The Times of India” qəzeti məlumat yayıb.
Nəşrin məlumatına görə, ölənlərdən 7-si Sitapur şəhərinin, 5-i isə Lakximpur-Xeri, Bahraich və Balrampur şəhərlərinin sakinləri olub. Ayodhya və Goraxpur şəhərlərinin hər birində isə 4 nəfər həyatını itirib.
Güclü yağışlar səbəbindən ştatda 1 000-dən çox ev dağılıb. Əlverişsiz hava şəraiti mal-qaranın tələf olmasına və əkin sahələrinə ziyan dəyməsinə də səbəb olub. Uttar-Pradeşin əksər rayonlarında yağıntının həcmi normanın 775 faizini təşkil edib.
