Danimarkanın paytaxtı Kopenhagen şəhərində yerləşən qeyri-adi bina həm memarlığı, həm də funksiyası ilə dünyanın diqqətini çəkir.
İnsanların damında xizək sürdüyü bu nəhəng tikilinin altında isə şəhərin tullantılarını enerji və istiliyə çevirən böyük sistem fəaliyyət göstərir.
“CopenHill” və ya “Amager Bakke” adı ilə tanınan bu layihə əslində tullantı yandırma və enerji istehsalı mərkəzidir. Müasir texnologiyalarla işləyən sistem şəhərin məişət tullantılarını emal edərək minlərlə ev üçün elektrik və istilik enerjisi istehsal edir.
Binanın ən diqqətçəkən xüsusiyyəti isə dam hissəsinin süni xizək trasına çevrilməsidir. İlboyu istifadəyə açıq olan trasda həm peşəkarlar, həm də həvəskarlar xizək sürə bilir. Kompleksdə yürüş yolları, dırmanma divarı və istirahət zonaları da yaradılıb.
Layihənin memarları sənaye obyektini insanların istifadə edə biləcəyi sosial məkana çevirməyi hədəflədiklərini bildiriblər. Bu səbəbdən bina həm enerji infrastrukturu, həm də əyləncə mərkəzi funksiyasını daşıyır.
Məlumata görə, obyekt ildə yüz minlərlə ton tullantını emal etmək gücünə malikdir. Emal zamanı yaranan enerji Kopenhagenin böyük hissəsinin istilik və elektrik ehtiyacını qarşılayır.
Mütəxəssislər bildirirlər ki, layihə həm ətraf mühitə təsirin azaldılması, həm də şəhər məkanlarının daha funksional istifadəsi baxımından dünyanın ən innovativ nümunələrindən biri hesab olunur./Musavat.com
