Yay aylarında havanın temperaturunun yüksəlməsi qida zəhərlənməsi riskini artırır. Bəzi ərzaqlar isti şəraitdə daha tez xarab olur və sağlamlıq üçün təhlükə yarada bilər.
Xüsusilə ət və ət məhsulları, toyuq əti, süd və süd məhsulları, yumurta, mayonez tərkibli yeməklər, kremli şirniyyatlar və dəniz məhsulları isti havalarda daha diqqətlə saxlanılmalıdır. Bu məhsullarda bakteriyalar yüksək temperaturun təsiri ilə sürətlə çoxala bilər.
Mütəxəssislər qeyd edirlər ki, qidaların uzun müddət otaq temperaturunda qalması, açıq havada saxlanılması və ya soyuq zəncir qaydalarının pozulması zəhərlənmə riskini əhəmiyyətli dərəcədə artırır. Pepperoni pizza
Qida zəhərlənməsi zamanı ürəkbulanma, qusma, qarın ağrısı, ishal, halsızlıq və bəzən yüksək hərarət kimi əlamətlər müşahidə oluna bilər. Risk qrupuna isə uşaqlar, yaşlılar, hamilə qadınlar və xroniki xəstəlikləri olan şəxslər daxildir.
Həkimlər yay mövsümündə qidaların düzgün saxlanılmasının vacibliyini vurğulayırlar. Onlar ət, süd və yumurta məhsullarının soyuducuda saxlanılmasını, bişmiş yeməklərin uzun müddət açıqda qoyulmamasını və meyvə-tərəvəzlərin istehlakdan əvvəl yaxşı yuyulmasını tövsiyə edirlər.
İsti havalarda qida təhlükəsizliyi qaydalarına əməl etmək həm zəhərlənmələrin, həm də müxtəlif infeksiyaların qarşısını almaq baxımından böyük əhəmiyyət daşıyır./yenisabah/
