“Bir çox
universitetlər imtahansız qəbul
olan subbakalavrlardan #narazıdır. Çünki onların əksəriyyəti işləyir, dərsə gəlmir.
Üstəlik tədrisin keyfiyyətinə tab gətirə bilmirlər.
Bu üzdən subbakalavrların qəbulunu bir çox universitetlər istəmir“.
Bu sözləri Dövlət İmtahan Mərkəzinin sədri Məleykə
Abbaszadə deyib.
Bu fikirlərə söykənilərək yaxın müddətdə
subbakalavrların universitetlərə imtahansız qəbulu dayandırıla bilərmi? Bu nə dərəcədə
effektiv ola bilər?
Təhsil məsələləri üzrə ekspert Elçin Əfəndi
Referans-a açıqlamasında bu sualları cavablandırıb.
“Məleykə
xanımın da qeyd etdiyi kimi, ali təhsil müəssisələrinin bir çoxu subbakalavrların
universitetlərə qəbul olmasını istəmirlər. Çünki bu, təhsil prosesində müəyyən
problemlərin olmasına gətirib çıxarır. Bu nöqteyi nəzərdən, bütün universitetlər
eyni səbəblərlə şikayət edərlərsə, düşünürəm ki, bir neçə ildən sonra
subbakalavrların ali təhsil müəssisələrinə müraciəti dayandırıla bilər. Nazirlər
Kabinetinin qərarı hələ ki qüvvədədir. Bu qərar əsasında 2012-ci ildən bu yana
orta ixtisas təhsili müəssisələrini bitirən şəxslər universitetlərə imtahansız
formada qəbul prosesində iştirak edə bilirlər. Demək olar ki, bu qərar artıq 5
ili əhatə edir. 5 ildir ki, subbakalavrlar ümumi ortalama göstəriciləri əsasında
ali təhsil müəssisələrinin müsabiqəsində imtahansız iştirak edirlər”.
Ekspert
qeyd edib ki, Azərbaycanda kollec istiqamətinə daha çox ali təhsil müəssilərinə
qəbul ola bilməyən şəxslər yönəlir. Onlar bunu həm də kolleclərdə oxumağı sonradan
imtahansız formada ali təhsil ala bilmələri üçün seçir.
“Orta
ixtisas təhsilini bitirən şəxslər artıq ixtisasları ilə bağlı birbaşa ali təhsil
müəssisələrinə qəbul olurlar. Nəticə etibarı ilə bu, onların həm akademik göstəricilərinə,
həm də tədris prosesinə mane olur. Problemin həlli üçün biz tədris prosesində
formal yox, obyektiv qiymətləndirməni təşkil etməliyik. Çünki bu qərardan sonra
təəssüflər olsun ki, bir çox halda təhsilalanların böyük əksəriyyəti ümumi
ortalama göstəricilərini hansısa üsullarla daha yüksək yazdırırlar. Çünki həmin
bal əsasında birbaşa qəbul aparılır. Nəticələri 85-90 bal üzəri olan
subbakalavrlar digərləri ilə müqayisədə daha rahat qəbul ola bilirlər. Ona görə
də formal qiymətləndirməni aradan qaldırmaq lazımdır ki, onların aldıqların
qiymət real biliklərini əks etdirsin. Belə olan halda biz kolleclərdən ali təhsil
istiqamətlərinə qəbul olan şəxslərin daha hazırlı olduqlarından əmin ola bilərik.
Əks halda ali təhsil müəssisələrində özünü doğrultmayan subbakalavrların
ucbatından bir neçə il sonra bu proses təmamilə ləğv oluna bilər”.
Fidan
Vəlisoy
