Ukrayna Prezidenti Volodimir Zelenski Davosda keçirilən Dünya İqtisadi Forumunda Avropa liderlərinə yönəlik sərt çıxışı ilə diqqət çəkib. Zelenski Avropanı Ukrayna və digər geosiyasi böhranlar fonunda qətiyyətli mövqe sərgiləməməkdə ittiham edərək, ABŞ Prezidenti Donald Trampın addımlarını gözləməklə “Qrenlandiya rejimində qalmaqda” günahlandırıb.
Referans Media xəbər verir ki, Avropanın Trampın Qrenlandiya ilə bağlı ambisiyaları və ABŞ-yə bu Arktika ərazisinə geniş çıxış imkanı verən son çərçivə razılaşmasının nəticələri ilə məşğul olduğu bir vaxtda Zelenskinin açıqlamaları xüsusi rezonans doğurub.
Zelenski çıxışında ötən il Davosda səsləndirdiyi fikirləri xatırladaraq bildirib: “Keçən il burada demişdim ki, Avropa özünü necə müdafiə edəcəyini bilməlidir. Bir il keçib, amma heç nə dəyişməyib. Avropa hələ də Qrenlandiya rejimindədir — kiminsə haradasa nəsə edəcəyini gözləyir.”
Ukrayna liderinin bu sözləri Rusiyanın davam edən hücumları fonunda Avropanın mövcud passivliyinə dair narazılığını açıq şəkildə ortaya qoyub. Zelenski Avropanı Rusiyaya qarşı daha sərt mövqe tutmağa, NATO üzvlərini müdafiə xərclərini artırmağa və Moskvanın müharibə maşınını maliyyələşdirən “kölgə” neft tanker donanmalarına qarşı tədbirlər görməyə çağırıb.
O, Qrenlandiyaya qoşun göndərilməsi kimi simvolik addımları da tənqid edərək, bunun real strateji əhəmiyyətini sual altına alıb: “Əgər Putin Litvanı işğal etmək və ya Polşaya hücum etmək qərarı versə, kim cavab verəcək? Hazırda NATO-nun mövcudluğu ABŞ-nin hərəkət edəcəyinə olan inama əsaslanır. Bəs əgər bu baş verməsə?”
Zelenski Avropanı tənqid etsə də, Trampa birbaşa hücumdan çəkinib. O, dialoqun vacibliyini qəbul etsə də, yeni yaradılan Sülh Şurası kimi təşəbbüslərdə Rusiyanın və ya onun müttəfiqi Belarusun iştirakı ilə müzakirələrin yalnız müharibə bitdikdən sonra mümkün ola biləcəyini vurğulayıb.
Ukrayna Prezidenti həmçinin bildirib ki, Ukrayna, Rusiya və ABŞ nümayəndələri bu həftəsonu Əbu-Dabidə bir araya gələrək 2022-ci ildən bəri ilk dəfə üçtərəfli danışıqlar aparacaqlar.
Sonda Zelenski ehtiyatlı nikbinlik nümayiş etdirərək qeyd edib: “Nəticənin necə olacağını görəcəyik. Amma dialoq qurmaq, ümumiyyətlə danışmamaqdan daha yaxşıdır.”
