Azərbaycanda həkimlərin ümumi sayı azalıb. 2025-ci ilin əvvəlində ölkədə 35 233 həkim olduğu halda, 2026-cı ilin əvvəlində bu göstərici 34 776 nəfərə düşüb. Beləliklə, bir il ərzində həkimlərin sayı 457 nəfər və ya təxminən 1,3 faiz azalıb.
Referans Media Dövlət Statistika Komitəsinin “Azərbaycanda səhiyyə, sosial müdafiə və mənzil şəraiti” məcmuəsinə əsasən xəbər verir ki, ixtisaslar üzrə ən böyük azalma terapevtlər, pediatrlar və cərrahlar arasında qeydə alınıb. Terapevtlərin sayı 8 910 nəfərdən 8 294 nəfərə düşüb. Bu, 616 nəfərlik azalma deməkdir.
Pediatrların sayı isə 2025-ci ildə 3 670 pediatr olduğu halda, 2026-cı ildə onların sayı 3 274 nəfər təşkil edib. Beləliklə, pediatrların sayı 396 nəfər azalıb.
Cərrahların sayı 3 722 nəfərdən 3 543 nəfərə enib. Bu ixtisas üzrə azalma 179 nəfər olub.
Terapevt, pediatr və cərrahlar başda olmaqla, həkimlərin sayının azalması nədən irəli gəlir?
Bizim.Media-ya danışan tibb eksperti Aydın Əliyevin fikrincə, hazırda ölkəmizdə tibbi kadr çatışmazlığı var:
"İstər müxtəlif ixtisaslı həkimlər baxımından, istərsə də orta tibb işçiləri baxımından ciddi kadr çatışmazlığı görülür. Son vaxtlar sosial mediada həkimlərin hədəf alındığını görürük.
Milli Onkologiya Mərkəzində Asif həkimin faciəvi şəkildə qətlə yetirilməsindən sonra bir müddət sakitlik var idi. Lakin yenə də həkimlərə qarşı aqressiya müşahidə olunur. Yeri gəldi-gəlmədi, əsası oldu-olmadı, araşdırmadan sanki həkimlərin üstünə hücum çəkirlər. Hər sahədə olduğu kimi, həkimlərin də içərisində savadlısı, az savadlısı, işinin yüksək səviyyəli peşəkarı və peşəkarlığı az olan var.
Üç-beş nəfərə görə bütün Azərbaycan səhiyyəsini qaralamaq düzgün deyil”
Ekspertin sözlərinə görə, həm maddi rifahın yetərli səviyyədə olmaması, həm də insanlar tərəfindən tənqid edilmələri həkimlərdə öz işlərinə qarşı soyuqluq yaradır və onlar başqa ölkələrdə işləməyə gedirlər:
"Bizim kifayət qədər istedadlı həkimlərimiz var ki, xarici ölkələrə axın edirlər. Universitet müəllimi olan həkim yoldaşım dərs keçdiyi qrupda kursda 13 nəfərin 12-sinin Almaniyaya hazırlaşdığını demişdi.
Bu elə bir ciddi məsələdir ki, hazırda lazımi qədər hiss etmirik. Lakin 5-10 il keçəndən sonra çox ciddi boşluqla üzləşəcəyik və onu da tez aradan qaldırmaq mümkün deyil. Bu proses tədricən baş verir.
Bir həkimin yetişməsi üçün ən azı 10 il vaxt lazımdır"
A.Əliyev hesab edir ki, aidiyyəti qurumlar indidən bu məsələ ilə ciddi məşğul olmalı, həkimlərə qarşı qarayaxma kampaniyasının qarşısı alınmalı və tibb işçilərinin maddi rifahı yaxşılaşdırılmalıdır.
Qeyd edək ki, bəzi ixtisaslar üzrə həkimlərin sayı artıb. Məsələn, oftalmoloqların sayı 968-dən 1001-ə, gigiyena-epidemiologiya həkimlərinin sayı isə 558-dən 671-ə yüksəlib.
