Türkiyə də daxil olmaqla 8 ölkənin xarici işlər nazirləri Qüds və Məscidül-Əqsa ətrafında baş verən hadisələrlə bağlı birgə bəyanat yayıblar.
Referans Media xəbər verir ki, bəyanatı imzalayan ölkələr sırasında Misir, İordaniya, İndoneziya, Pakistan, Qətər, Səudiyyə Ərəbistanı və Birləşmiş Ərəb Əmirlikləri də yer alır.
Bəyanatın əsas mesajı
Nazirlər Məscidül-Əqsa ərazisinə edilən basqın və bayraq insidentlərini kəskin şəkildə pisləyib. Bu hərəkətlərin beynəlxalq hüququn pozulması olduğunu bildirib. Qüdsün tarixi və hüquqi statusunun dəyişdirilməsinin qəbuledilməz olduğunu vurğulayıb.
Bəyanatda xüsusi olaraq qeyd olunur ki, Məscidül-Əqsa yalnız müsəlmanların ibadət yeri kimi qəbul edilir. Əraziyə nəzarət İordaniya Vəqflər Nazirliyi tərəfindən həyata keçirilir. Mövcud status-kvo qorunmalıdır.
İsrailə qarşı tənqidlər
Nazirlər İsrailin qanunsuz məskunlaşma siyasətini, Fələstin torpaqlarında artan zorakılığı, yeni yaşayış məntəqələrinin təsdiqini kəskin şəkildə qınayıblar.
Fələstinə dəstək mesajı
Bəyanatda Fələstin xalqının hüquqlarına dəstək ifadə olunaraq, iki dövlətli həll modelinin yeganə çıxış yolu olduğu vurğulanıb.
