ABŞ-ın Wisconsin ştatında güclü yağış və sel səbəbilə fövqəladə vəziyyət elan olunub. Yerli KİV-lərin məlumatına görə, ölkənin mərkəzi və daxili bölgələrində yağan intensiv yağışlar yolları su altında qoyub, bir çox ərazilərdə ciddi ziyan yaranıb.
Ştatın qubernatoru Tony Evers güclü qasırğa və yağışlara görə rəsmi qərar qəbul edib. Milwaukee şəhərində sel səbəbindən avtomobillərin hərəkəti dayanıb, bəzi vətəndaşlar xilas edilib.
Eyni zamanda, Michigan ştatının Ann Arbor və Lincoln Park şəhərlərində güclü küləklə müşayiət olunan hortumlar qeydə alınıb. Hortumlar binalara, infrastruktura və ağaclara ziyan vurub, bəzi ərazilərdə elektrik kəsintiləri baş verib.
ABŞ Milli Hava Xidməti digər bölgələrdə də yeni qasırğa və hortum riskinin davam etdiyini bildirib. Ümumilikdə, 50 milyondan çox insan təhlükə ilə bağlı xəbərdar edilib.
