Türkiyənin nəhəng klublarından biri olan "Fənərbaxça" yeni mövsüm öncəsi mühüm dəyişikliklərə hazırlaşır. İddialara görə, klubun prezidenti Aziz Yıldırım futbol komandasının idarəçiliyini yenidən Aykut Kocamana həvalə etməyə hazırlaşır.
Referans Media xəbər verir ki, tərəflər arasında ilkin razılıq əldə edilib və rəsmi müqavilənin yaxın günlərdə imzalanması gözlənilir. Klub rəhbərliyinin təqdimat mərasimindən sonra Kocamanın mətbuat konfransı keçirəcəyi bildirilir.
İddialara əsasən, təcrübəli mütəxəssislə bir illik müqavilə bağlanacaq.
Yeni texniki heyətin formalaşdırılması istiqamətində də mühüm addımlar atılır. Məlumatlara görə, vaxtilə sarı-göylü formanı geyinmiş bir sıra tanınmış simalar məşqçilər korpusunda yer alacaq.
Bunlar arasında Volkan Demirel, Pyer Vebo, Dirk Kuyt kimi klub tarixində iz qoymuş futbolçuların adları çəkilir.
Aykut Kocaman daha əvvəl həm futbolçu, həm də baş məşqçi kimi "Fənərbaxça"da uğurlu dövrlər keçirib. Onun yenidən komandaya qayıtması ehtimalı sosial şəbəkələrdə geniş müzakirələrə səbəb olub.
Lakin qeyd etmək lazımdır ki, klub tərəfindən hələlik rəsmi açıqlama verilməyib və bütün məlumatlar media iddialarına əsaslanır.
