Albalı saplağı çayı ənənəvi olaraq təbii sidikqovucu kimi istifadə olunur. Bu xüsusiyyəti sayəsində orqanizmdə yığılan artıq mayenin xaric olunmasına dəstək verə və ödəmdən qaynaqlanan şişkinlik hissini azalda bilər.
Referans Media xəbər verir ki, birbaşa yağ yandırıcı təsiri sübut olunmasa da, ödəmin azalması nəticəsində arıqlama prosesində daha yüngül hiss etməyə dəstək verə bilər.
Bununla yanaşı, kifayət qədər maye qəbulu ilə birlikdə istifadə edildikdə sidik yollarının sağlamlığını qorumağa kömək edə bilər.
Bu çayın hazırlanma qaydası: 1 stəkan (təxminən 200-250 ml) qaynar suya 1 xörək qaşığı qurudulmuş albalı saplağı əlavə edin. Zəif odda 5-10 dəqiqə qaynadın. Daha sonra ocaqdan götürərək bir neçə dəqiqə dəmlənməyə qoyun. Süzdükdən sonra ilıq şəkildə istehlak edə bilərsiniz.
Albalı saplağı çayı güclü sidikqovucu təsirə malik olduğundan həddindən artıq istifadə orqanizmdə susuzlaşmaya və kalium kimi vacib mineralların azalmasına səbəb ola bilər. Buna görə də gün ərzində 1–2 fincandan artıq qəbul edilməsi tövsiyə olunmur.
Xroniki böyrək xəstəliyi olan şəxslər, hamilə qadınlar, süd verən analar və müntəzəm dərman qəbul edən insanlar bu çayı istifadə etməzdən əvvəl mütləq həkimlə məsləhətləşməlidirlər./musavat.com/
