Özünü ictimaiyyətə "beynəlxalq hüquq müdafiəçisi", "diaspor nümayəndəsi" və "Magen David Azərbaycan" təşkilatının rəhbəri kimi tanıdan "David Seliverstov"un fəaliyyəti ətrafında yeni suallar yaranıb. Maraqlıdır ki, həmin şəxsin öz müsahibəsində səsləndirdiyi açıqlamalar təşkilatın yaranması və onun arxasında dayanan şəxslərlə bağlı diqqətçəkən məqamları üzə çıxarır.
"David Seliverstov" 2025-ci ilin oktyabrında MTV-yə verdiyi müsahibəsində bildirib ki, rəhbərlik etdiyi "Magen David Azərbaycan İnsan Hüquqları və Xeyriyyə Cəmiyyəti" 2021-ci il avqustun 16-da Milli Məclisin deputatı, Azərbaycan–İsrail parlamentlərarası işçi qrupunun rəhbəri Anatoliy Rafailovun təşəbbüsü ilə yaradılıb.
Onun sözlərinə görə, "Magen" sözü ivrit dilində "Davudun qalxanı" mənasını verir və təşkilatın əsas məqsədi yəhudi irsinin qorunması, xeyriyyəçilik fəaliyyəti, şəhid ailələrinə dəstək və sosial layihələrin həyata keçirilməsidir.
Bu açıqlama diqqətdən yayınmır. Çünki təşkilatın rəsmi internet səhifəsində də eyni məlumat yer alır. Saytda "Magen David Azərbaycan İnsan Hüquqları və Xeyriyyə Cəmiyyəti"nin məhz Anatoliy Rafailovun təşəbbüsü ilə yaradıldığı qeyd edilir, o, eyni zamanda təşkilatın fəxri sədri kimi təqdim olunur.
"Magen David Azərbaycan"ın fəaliyyəti son illər nəzərəçarpacaq dərəcədə genişlənib. Təşkilat müxtəlif konfranslar, forumlar, humanitar aksiyalar, media tədbirləri və Azərbaycan–İsrail münasibətlərinə həsr olunmuş layihələr keçirib.
Rəsmi saytda təşkilatın hüquq departamenti, yüksək texnologiyalar istiqaməti, "Azərbaycan–İsrail Ticarət Evi" layihəsi və digər platformaları haqqında da məlumat yerləşdirilib. Eyni zamanda saytda "David Seliverstov" beynəlxalq hüquq müdafiəçisi, "Magen David Azərbaycan"ın direktoru, Ümumisrail Qafqaz Yəhudiləri Assosiasiyasının Azərbaycan nümayəndəliyinin sədri və digər ictimai statuslarla təqdim olunur.
Araşdırma zamanı diqqəti çəkən əsas məqam təşkilatın mövcudluğu deyil. Əsas məsələ "David Seliverstov" adı altında formalaşdırılan ictimai nüfuzun hansı mexanizmlərlə yaranmasıdır. Təşkilatın rəhbərinin bioqrafiyası, beynəlxalq statusları və müxtəlif platformalarda təqdim olunan vəzifələri təşkilatın öz resurslarında göstərilir. Bu məlumatların hansı sənədlərlə təsdiqləndiyi isə ayrıca araşdırma mövzusudur.
"David Seliverstov"un öz müsahibəsində və təşkilatın rəsmi məlumatlarında Anatoliy Rafailovun təşəbbüskar kimi göstərilməsi ictimai maraq doğuran faktdır. Bunun özü hər hansı qanun pozuntusu anlamına gəlmir. Lakin təşkilatın yaradılması, idarə olunması və ictimai fəaliyyətində deputatın rolunun hüquqi çərçivəsinin aydın izah olunması ictimai baxımdan əhəmiyyətlidir.
Rəsmi internet səhifəsində 2025–2026-cı illərdə təşkilatın fəaliyyətinin daha da genişləndiyi görünür. Burada müxtəlif dövlət qurumları ilə əməkdaşlıq, beynəlxalq tədbirlər, iqtisadi layihələr və səhiyyə sahəsində memorandumlar barədə xəbərlər dərc olunub.
Araşdırma nəticəsində aşağıdakı suallar ortaya çıxır:
- Deputat Anatoliy Rafailov bu təşkilatın əsasını qoyarkən və ona himayədarlıq edərkən rəhbər təyin olunan şəxsin keçmişindən və real simasından xəbərdar olubmu?
- Məhkum olunmuş və hüquqi problemi olan bir şəxsin "beynəlxalq hüquq müdafiəçisi" adı altında müxtəlif dövlət qurumları və beynəlxalq platformalarla əlaqə qurmasına necə şərait yaradılıb?
- Ölkəni tərk etmiş bu şəxsin idarə etdiyi və ya adından istifadə etdiyi layihələrin hüquqi aqibəti necə olacaq?
"Magen David Azərbaycan"ın təsis sənədlərində təsisçilər kimlərdir?
- Anatoliy Rafailovun təşkilatdakı hüquqi statusu konkret nədən ibarətdir?
- "David Seliverstov" adı hüquqi ad dəyişikliyi, təxəllüs, yoxsa başqa əsasla istifadə olunur?
- Təşkilatın beynəlxalq tərəfdaşlıqları və təqdim olunan statusları hansı rəsmi sənədlərlə təsdiqlənir?
- Maliyyə mənbələri və fəaliyyət hesabatları ictimaiyyət üçün hansı həcmdə açıqlanıb?
Bütün bu suallar cavab gözləyir və "Magen David" pərdəsi arxasında gizlənən maraqların tam şəkildə araşdırılmasını zəruri edir.
Xatırladaq ki, "David Seliverstov" - Kazım Abbasovun saxta vəsiqələrdən və qanunsuz statuslardan istifadə etməsi ilk dəfə deyil. Əldə olunan məlumatlara əsasən, illər əvvəl – 2011–2012-ci illərdə Xəzər rayonunda baş verən həbslərin arxasında da məhz saxta Dövlət Təhlükəsizliyi Xidmətinin (və ya o dövrün qurumlarının) vəsiqələrindən istifadə halları dayanır.
Həmin dövrə aid məhkəmə hökmləri və sənədlər də təsdiqləyir ki, bu şəxs hələ illər əvvəl eyni üsulla – güc strukturlarının adından və saxta sənədlərdən sui-istifadə etməklə vətəndaşları aldadıb. İllər sonra yenidən səhnəyə çıxaraq özünə "David Seliverstov" kimi yeni beynəlxalq imic qazandıran həmin şəxs köhnə vərdişlərindən əl çəkməyib və eyni üsulla fəaliyyətini davam etdirib.
Hüquq müdafiəçilərinin (Səidə Qocamanlı, Novella Cəfəroğlu, Səadət Bənənyarlı və Çingiz Qənizadə) Musavat.com-a təqdim etdikləri məlumatlara görə, Azərbaycanda rəsmi olaraq "David Seliverstov" adında vətəndaş mövcud deyil. Bu ad altında fəaliyyət göstərən şəxsin əslində Kazım Elşən oğlu Abbasov olduğu müəyyənləşdirilib.
Onun kifayət qədər zəngin və qaranlıq kriminal keçmişi olub:
- 2011-ci ildə dələduzluq ittihamı ilə saxlanılaraq məhkum edilib.
- Daha sonra saxta sənədlərdən istifadə və vəzifəli şəxsin səlahiyyətlərini mənimsəmə maddələri ilə məsuliyyətə cəlb olunub.
- 2014-cü ildə isə külli miqdarda narkotik vasitələrin qanunsuz dövriyyəsi ittihamı ilə yenidən həbs edilib və Bakı Ağır Cinayətlər Məhkəməsinin hökmü ilə uzun müddətə azadlıqdan məhrum edilib. 2022-ci ildə azadlığa çıxdıqdan sonra isə o, Azərbaycan cəmiyyətinə "beynəlxalq hüquq müdafiəçisi" kimi təqdim olunub.
Musavat.com-da bu barədə silsilə ifşaedici materiallar yayımlandıqdan dərhal sonra Kazım Abbasov - "David Seliverstov" gecə saatlarında Azərbaycanı tərk edib. İlkin olaraq Gürcüstana üz tutduğu bildirilən bu şəxs sonradan sosial şəbəkələrdə İsraildən görüntülər yayaraq guya işgüzar səfərdə olduğunu və ölkəyə investisiya cəlb etdiyini iddia etməyə çalışıb.
Lakin mütəxəssislər və media nümayəndələri həmin videoların saxta statusu ört-basdır etmək üçün növbəti bir şou olduğunu vurğulayırlar.
Hüquq-mühafizə orqanları və hüquq müdafiəçiləri zərərçəkən vətəndaşları və bu şəxsdən hər hansı formada təzyiq və ya təhdid görənləri çəkinmədən müvafiq qurumlara – Daxili İşlər Nazirliyinə müraciət etməyə çağırırlar.
Araşdırmalar davam edir.
Musavat.com mövzu ilə bağlı deputat Anatoliy Rafailovun mövqeyini dərc etməyə hazırdır.
E.Məmmədəliyev,
Musavat.com
