İsrail Müdafiə Qüvvələri (ÇAXAL) davam edən “Epik Qəzəb” (Epic Fury) əməliyyatının son iki sutkadakı nəticələrinə dair rəsmi statistikanı açıqlayıb.
Çağdaş.Az xəbər verir ki, ordunun mətbuat xidməti İsrail Hərbi Hava Qüvvələrinin son 48 saatda İran və Livan ərazilərindəki strateji obyektlərə rekord sayda zərbə endirdiyini bəyan edib.
Rəsmi məlumata görə, əməliyyatın coğrafiyası və intensivliyi aşağıdakı kimidir:
İran istiqaməti: Ölkə daxilindəki hərbi bazalar, HHM sistemləri, raket anbarları və SEPAH-ın idarəetmə mərkəzləri daxil olmaqla 300 hədəf məhv edilib. Xüsusilə İsfahan, Tehran və Şirazdakı strateji obyektlərə ciddi ziyan dəyib.
Livan istiqaməti: “Hizbullah”ın mövqeləri, tunellər, silah anbarları və komanda məntəqələri daxil olmaqla 170 hədəf darmadağın edilib.
ÇAXAL rəsmiləri bildiriblər ki, bu zərbələr İranın regional proksi qüvvələri ilə əlaqəsini kəsmək və Tehranın raket hücumu potensialını tamamilə iflic etmək məqsədi daşıyır. Eyni zamanda, İsrail kəşfiyyatı vurulan hədəflərin əksəriyyətinin peyk görüntüləri və pilotsuz təyyarələr vasitəsilə dəqiqləşdirildiyini, mülki itkilərin minimuma endirilməsi üçün dəqiq idarəolunan sursatlardan istifadə edildiyini vurğulayıb. Analitiklər bu intensivliyi son onilliklərin ən böyük hava əməliyyatı kimi qiymətləndirirlər./Musavat.com/
