Səudiyyə Ərəbistanının paytaxtına hücum: Raketlər havada məhv edildi

Yəməndə fəaliyyət göstərən, İranın dəstəklədiyi husilər Səudiyyə Ərəbistanının paytaxtı Ər-Riyaddakı Kral Xalid Beynəlxalq Hava Limanına və maliyyə mərkəzinə qanadlı raketlərlə hücum etdiklərini açıqlayıblar. Səudiyyə Ərəbistanının rəhbərlik etdiyi koalisiya isə paytaxta yönələn raket və pilotsuz uçuş aparatlarının zərərsizləşdirildiyini bildirib.

Referans Media xəbər verir ki, husilərin hərbi sözçüsü Yəhya Səri noyabrın 18-də verdiyi açıqlamada Ər-Riyaddakı hava limanına və maliyyə mərkəzinə çoxsaylı qanadlı raketlər atdıqlarını iddia edib. O, raketlərin hədəfləri vurduğunu söyləyərək hücumların Yəməndə mülki obyektlərə qarşı əməliyyatlara cavab olaraq həyata keçirildiyini bildirib.

Səudiyyə Ərəbistanının rəhbərlik etdiyi Ərəb Koalisiyasının sözçüsü Türki əl-Maliki isə Ər-Riyad istiqamətində göndərilən iki qanadlı raketin havada ələ keçirilərək məhv edildiyini açıqlayıb. Onun sözlərinə görə, paytaxt və ölkənin cənub bölgələrinə yönələn iki pilotsuz uçuş aparatı da zərərsizləşdirilib. Beləliklə, husilərin hava limanı və maliyyə mərkəzinin vurulması ilə bağlı iddiaları Səudiyyə Ərəbistanı tərəfindən təsdiqlənməyib.

Husilər Ər-Riyadla yanaşı, Səudiyyə Ərəbistanının cənubundakı Cizan bölgəsində strateji obyekti ballistik raketlərlə vurduqlarını iddia ediblər. Qrup həmçinin Xəmis-Müşeyt şəhərində yerləşən Kral Xalid Hərbi Hava Bazasının pilotsuz uçuş aparatı ilə hədəf alındığını açıqlayıb. Hücumların nəticələri, mümkün dağıntılar və itkilərlə bağlı müstəqil təsdiqlənmiş məlumat açıqlanmayıb.

Yəməndə husilərin 2014-cü ildə paytaxt Sənaya nəzarəti ələ keçirməsindən sonra dərinləşən daxili müharibə 2015-ci ildə Səudiyyə Ərəbistanının rəhbərlik etdiyi koalisiyanın müdaxiləsi ilə regional münaqişəyə çevrilib. 2022-ci ilin aprelində başlayan atəşkəs prosesi ölkədə gərginliyi nisbətən azaltsa da, sonrakı dövrdə qarşıdurmalar yenidən güclənib. Husilərin Səudiyyə Ərəbistanındakı hava limanlarını, hərbi bazaları və enerji obyektlərini hədəf aldığını bildirməsi regionda təhlükəsizlik narahatlıqlarını artırır.
 

 

 

 

Referansaz.az-ı Google seçilmiş mənbələrinə əlavə edin
Xəbərlərimizi Google-da daha asan izləyin!

  • whatsapp
  • messenger
  • telegram
  • vkontakte
  • odnoklassniki