ABŞ və İsrailin hücumları ilə davam edən müharibə fonunda İran raket hücumlarının miqyasını və gücünü artırmaq qərarı verib. İran İnqilab Keşikçiləri Korpusunun Hərbi Hava Qüvvələrinin komandanı Hüseyn Məcid Musəvi bundan sonra istifadə olunacaq raketlərlə bağlı diqqətçəkən açıqlama verib.
Referans Media xəbər verir ki, Komandan bildirib ki, İranın növbəti hücumlarında 1 tondan daha yüngül döyüş başlığına malik heç bir raket istifadə edilməyəcək.
Onun sözlərinə görə: “Bundan sonra 1 tondan daha yüngül döyüş başlığına sahib heç bir raket buraxılmayacaq. Hücumların tezliyi artacaq və miqyası daha geniş olacaq.”
İran tərəfi bildirib ki, ABŞ və İsrail hədəflərinə qarşı raket zərbələri daha intensiv və daha geniş coğrafiyada həyata keçiriləcək. Tehran bunu 28 fevralda başlayan hücumlara cavab addımı kimi qiymətləndirir.
İran İnqilab Keşikçiləri daha əvvəl açıqlamışdı ki, “Əsl Vəd 4” əməliyyatının 31-ci dalğası həyata keçirilib. Bildirilir ki, bu hücumlar yeni dini lider elan edilən Müctəba Xameneiyə həsr olunmuş və əməliyyat zamanı super ağır döyüş başlıqlı raketlər istifadə edilib.
Məlumata görə, İran ABŞ və İsrailə qarşı cavab zərbələri çərçivəsində bölgədə ABŞ hərbi bazalarının yerləşdiyi Küveyt, Birləşmiş Ərəb Əmirlikləri və Bəhreyn kimi ölkələrdə müəyyən hədəflərə də hücumlar həyata keçirib.
İran rəsmilərinin məlumatına görə, ABŞ və İsrailin hücumları nəticəsində ölkədə 1332 nəfər həlak olub. Ölənlər arasında İranın ali dini lideri Əli Xamenei və bir sıra yüksək rütbəli rəsmilərin də olduğu bildirilir.
