Türkiyə Super Liqasında günün ən böyük hesabı qeydə alınıb. Fənərbaxça doğma meydanda Eyyubsporu 8:0 hesabı ilə darmadağın edib.
Referans Media xəbər verir ki, İstanbulda “Şükrü Saracoğlu” stadionunda keçirilən VI tur qarşılaşmasında meydan sahibləri artıq ilk hissədə rəqibin qapısından 5 cavabsız top keçiriblər.
Hesabı 5-ci dəqiqədə penaltidən Mason Qrinvud açıb. Cəmi iki dəqiqə sonra Vedat Muriqi fərqi artırıb. 21-ci dəqiqədə Muriqi yenidən fərqlənərək hesabı 3:0 edib. Matteo Genduzi 38-ci, İrfan Can Kahveci isə 45+1-ci dəqiqədə qol vurub və komandalar fasiləyə 5:0 hesabı ilə yollanıblar.
İkinci hissədə də Fənərbaxça dayanmayıb. Muriqi 47 və 55-ci dəqiqələrdə daha iki dəfə rəqib qapısına yol taparaq matçdakı qollarının sayını 4-ə çatdırıb. Son nöqtəni isə 80-ci dəqiqədə Qrinvud qoyub – 8:0. Beləliklə, Qrinvud qarşılaşmanı dublla tamamlayıb.
Bu qələbədən sonra Fənərbaxça xallarının sayını 10-a çatdırıb. Komanda ilk beş turda cəmi 7 xal toplamışdı.
Qollar: Qrinvud – 5 (pen.), 80; Muriqi – 7, 21, 47, 55; Genduzi – 38; İrfan Can Kahveci – 45+1.
