Milli Təhsil naziri Yusuf Tekin bildirib ki, Prezident Rəcəb Tayyib Ərdoğanın tapşırığı ilə məktəblərdə təhlükəsizliyin artırılması üçün yeni tədbirlər hazırlanır. Hazırlanan dəyişikliklərin detalları cümə və ya bazar ertəsi günü ictimaiyyətə açıqlanacaq.
Nazir qeyd edib ki, məqsəd həm şagirdlərin, həm də valideynlərin məktəblərə daha güvənli şəkildə yanaşmasını təmin etməkdir. “Övladlarımızın təhsilini təhlükəsiz mühitdə davam etdirməsi üçün lazımi addımlar atılır. Prezidentimiz bu barədə müvafiq göstərişlər verib”, – deyə o bildirib.
Referans Media xəbər verir ki, yeni təhlükəsizlik tədbirlərinin geniş paket şəklində təqdim olunacağı, həm mövcud qaydaların, həm də yeni tətbiqlərin açıqlanacağı bildirilib.
Planlaşdırılan əsas yeniliklər
Yeni qaydalara əsasən məktəblərdə aşağıdakı tədbirlərin tətbiqi nəzərdə tutulur:
Görüş təyin etmədən məktəb ziyarətləri qadağan ediləcək
Ziyarətçilər təhlükəsizlik yoxlamasından keçiriləcək
Şagirdlərin mobil telefon, ağıllı saat və planşetlə məktəbə gəlməsi qadağan olunacaq
Məktəbə yalnız vahid geyimlə giriş icazəli olacaq
Məktəb ətrafında icazəsiz toplaşmaların qarşısı alınacaq
Turniket sistemləri genişləndiriləcək
Metal detektorlarla yoxlamalar artırılacaq
Həmyaşıd zorakılığına qarşı ciddi tədbirlər görüləcək
Risk yüksək olan məktəblərdə isə polis nəzarəti gücləndiriləcək, giriş-çıxışlarda yoxlamalar sərtləşdiriləcək.
Bundan əlavə, bütün məktəblərin mərkəzləşdirilmiş kamera və nəzarət sisteminə (KGYS) inteqrasiya olunması planlaşdırılır.
