Çinin Sindao (Qingdao) şəhərində gecə saatlarında qüvvədə olan üzgüçülük qadağasını pozaraq dənizə girən şəxs təhlükəsizlik qüvvələrinin istifadə etdiyi səsucaldıcılı dron tərəfindən aşkarlanaraq sudan çıxmağa məcbur edilib.
Referans Media xəbər verir ki, şəhərin sahil zolağında gecə saatlarında tətbiq edilən təhlükəsizlik nəzarəti çərçivəsində xidmət aparan pilotsuz uçuş aparatı qaranlıqda dənizə girən şəxsi müəyyən etdikdən dərhal sonra onun üzərinə yaxınlaşıb.
Dron üzgüçünü addım-addım izləyib
Pilotsuz aparat dənizdə üzən şəxsi havadan izləməklə kifayətlənməyib, onun yaxınlığına qədər enərək hərəkətlərini nəzarətdə saxlayıb. Bu, üzgüçünün dənizdə irəliləməsini çətinləşdirib və diqqətini təhlükəsizlik xəbərdarlığına yönəldib.
Səsucaldıcı ilə xəbərdarlıq edildi
Dronun üzərində quraşdırılmış səs sistemi vasitəsilə vətəndaşa gecə üzməyin qadağan olunduğu xatırladılıb və dərhal sahilə qayıtması tələb edilib. Hadisənin görüntüləri göstərir ki, Çində istifadə olunan bu pilotsuz aparatların funksiyası yalnız müşahidə aparmaqla məhdudlaşmır, onlar təhlükəsizlik tədbirlərinə birbaşa müdaxilə etmək üçün də istifadə olunur.
Məqsəd boğulma hallarının qarşısını almaqdır
Çin çimərliklərində geniş tətbiq edilən bu sistem gecə saatlarında baş verə biləcək boğulma hadisələrinin qarşısını almaq məqsədi daşıyır. Texnologiyanın təhlükəsizlik xidmətlərinə inteqrasiyası sayəsində qadağalara nəzarət daha operativ və effektiv şəkildə həyata keçirilir.
