Braziliyanın Sao Paulo əyalətində yerləşən və “İlan Adası” adı ilə tanınan “Ilha da Queimada Grande”, dünyanın ən təhlükəli quru parçası hesab edilir. Adanın təhlükəli olmasının səbəbi ölümcül ilanların sıxlığı və genetik inkişaflarıdır.
Referans media xəbər verir ki, Braziliya hökuməti və Dəniz Qüvvələri tərəfindən tətbiq edilən sərt qaydalara görə, adaya yalnız xüsusi elmi tədqiqat icazəsi olan şəxslər daxil ola bilər.
Adanın yeganə sakinləri, “Qızıl başlı ilanlar” (Bothrops insularis) adlı ölümcül ilanlardır. Aparılan araşdırmalara görə, adada təxminən 2–4 min ilan yaşayır və kvadrat başına 1–5 ilan düşür.
İlanlar əsasən köçəri quşları ovlamaq üçün ağaclarda və yerdə sıxlaşır. Adada digər yırtıcıların olmaması, ilanların qida zəncirinin ən üst səviyyədə olmasına və bütün adaya yayılmasına imkan verir.
Bu ilanların zəhəri insan toxumasını saniyələr içində dağıda bilir. Müdaxilə edilməzsə, ölüm nisbəti təxminən 100%-dir. Zəhər böyrək çatışmazlığı, əzələ məhv edilməsi və beyin qanaması kimi ciddi fəsadlara yol açır.
Adadakı yeganə bina olan mayak isə tam avtomatik işləyir. Tarixi qeydlərə görə, 1920-ci illərdə mayakda işləyən son mühafizəçi və ailəsi, ilanların hücumu nəticəsində ölüb.
Bu gün yalnız Braziliya Donanması və xüsusi icazəli bioloqlar, qoruyucu geyim və panzehir dəstləri ilə adaya daxil ola bilir. Sərt nəzarət həm insan həyatı, həm də nəsli tükənməkdə olan ilanların qorunması məqsədini güdür.
