Təzə nanə çeynəmək deyilənlərə görə, ağız qoxusunun aradan qaldırılması, ağız gigiyenası və diş əti sağlamlığı üçün faydalıdır. Lakin bu aromatik bitkinin təsiri bununla məhdudlaşmır.
Referans Media xəbər verir ki, son dövrlərdə aparılan müşahidələr və elmi izahlar göstərir ki, təzə nanə iştahın azalmasına da təsir göstərir.
Xüsusilə yay ayları yaxınlaşdıqca bu xüsusiyyət daha çox diqqət çəkir.
Mütəxəssislərin bildirdiyinə görə, nanənin əsas aktiv maddəsi olan mentol ağız və burun boşluğunda yerləşən TRPM8 reseptorlarını stimullaşdırır. Bu reseptorlar “soyuma” hissinin yaranmasına cavabdehdir.
Bu proses beynin dad və qoxu mərkəzlərinə təsir edərək qida qəbuluna olan istəyi müvəqqəti olaraq azalda bilər. Nəticədə insanın yemək istəyi zəifləyə bilər.
Eyni zamanda nanənin güclü aroması da iştaha təsir edən amillərdən biridir. Bəzi araşdırmalarda nanə qoxusuna məruz qalan insanların gün ərzində daha az kalori qəbul etdiyi müşahidə olunub.
Mütəxəssislər bildirir ki, səhərlər 1-2 ədəd təzə nanə yarpağının çeynənməsi həm nəfəsi təravətləndirə, həm də gün ərzində iştahanın nəzarətdə saxlanmasına kömək edə bilər./sfera.az
