Qış fəslinin yaxınlaşması ilə havaların soyuması avtomobillərin, xüsusən də yanacaq sisteminin işinə birbaşa təsir göstərir. Aşağı temperaturlarda yanacağın yanma effekti düşür, mühərrik daha gec qızır və nəticədə yanacaq sərfiyyatı nəzərəçarpacaq dərəcədə artır. Şaxtalı günlərdə həm sürüş rahatlığını qorumaq, həm də büdcəyə qənaət etmək üçün sürücülər öncədən müəyyən profilaktik tədbirlər görməlidirlər. Yanacağın keyfiyyətini və istifadə effektivliyini artırmaq üçün ilk növbədə avtomobilin texniki vəziyyətinə və yanacaq doldurma vərdişlərinə diqqət yetirilməlidir.
Referans Media xəbər verir ki, “Yeni Sabah”ın araşdırmasına əsasən, qışda sərfiyyatı optimallaşdırmağın ən vacib şərtlərindən biri yanacaq filterinin və alışdırma şamlarının (sveçaların) vaxtında dəyişdirilməsidir. Tutulmuş filter yanacağın mühərrikə bərabər paylanmasına mane olur, köhnəlmiş şamlar isə yanacağın tam yanmamasına gətirib çıxarır ki, bu da birbaşa israfçılıq deməkdir. Bununla yanaşı, soyuq havalarda təkərlərdə təzyiqin düşməsi yumşalma yaradır və yuvarlanma müqavimətini artırır. Təkər təzyiqini istehsalçının normasına uyğun saxlamaq yanacaq sərfində 3-5 faizə qədər qənaət təmin edir.
Mühərrikin qızdırılması vərdişinə də yenidən baxmaq lazımdır. Avtomobili yerində saatlarla xodlanmış saxlamaq yanacağı sadəcə havaya sovurur. Müasir mühərriklərdə 1-2 dəqiqəlik ilkin qızma kifayətdir, bundan sonra aşağı dövrələrlə yavaş-yavaş hərəkətə başlamaq həm mühərriki, həm də sürətlər qutusunu daha tez və az sərfiyyatla optimal temperatura çatdırır. Həmçinin, qışda baka hər zaman yarıdan çox yanacaq vurmaq tövsiyə olunur. Bu, bakda boş qalan hissədə kondensasiya nəticəsində su damcılarının yaranmasının və həmin suyun yanacaq sistemində donaraq xətləri tutmasının qarşısını alır.
Sürücüləri ən çox maraqlandıran məsələlərdən biri də yanacaq qatqılarının (prisadkaların) istifadəsinin vacibliyidir. Qış aylarında xüsusilə dizel mühərrikli avtomobillər üçün anti-gel (donmaya qarşı) qatqılar həyati əhəmiyyət daşıya bilər. Dizel yanacağının tərkibindəki parafin şaxtada kristallaşaraq filteri tutur və avtomobilin işə salınmasına imkan vermir. Yanacaq vurulmazdan əvvəl baka əlavə edilən keyfiyyətli anti-gel yanacağın donma həddini aşağı salır.
Benzinlə işləyən avtomobillərdə isə yanacaq sistemini sudan və nəmdən təmizləyən (dehidrator) qatqılardan və ya injektor təmizləyicilərdən istifadə etmək olar. Lakin burada əsas məqam qatqının keyfiyyəti və doğru dozasında istifadə edilməsidir. Keyfiyyətsiz və ya normadan artıq tökülən prisadkalar mühərrikdəki çöküntüləri qopardaraq forsunkaları daha pis tuta bilər. Əgər avtomobilə hər zaman etibarlı brendlərin keyfiyyətli yanacağı vurulursa, gündəlik istifadə üçün hər dəfə qatqı əlavə etməyə ehtiyac yoxdur.
Yekun olaraq, qışda yanacaq effektivliyini artırmağın ən etibarlı yolu mövsümi texniki baxışı axsatmamaq, təkər təzyiqini nəzarətdə saxlamaq və yalnız ehtiyac olduqda sertifikatlaşdırılmış düzgün qatqılardan istifadə etməkdir.
