Bursanın Mustafakemalpaşa rayonunda bir restoranda boğulma təhlükəsi yaşayan şəxs, hadisə yerində olan polis komissarının vaxtında tətbiq etdiyi Heimlich manevrası sayəsində ölümdən xilas edilib.
Referans Media xəbər verir ki, Türkiyədə restoranlardan birində baş verən hadisə faciə ilə nəticələnə bilərdi. Restoranda yemək yeyən C.G. adlı şəxs qəfil nəfəs borusuna qida parçasının ilişməsi nəticəsində boğulma təhlükəsi ilə üzləşib.
Hadisə zamanı restoranda olan və Mustafakemalpaşa Rayon Polis İdarəsində xidmət edən polis rəisi Eren Güner vəziyyəti dərhal anlayıb. C.G.-nin nəfəs almaqda çətinlik çəkdiyini görən polis vaxt itirmədən Heimlich manevrasını tətbiq edib.
Polis rəisinin peşəkar və soyuqqanlı müdaxiləsi nəticəsində qida parçası C.G.-nin boğazından çıxarılıb və onun həyatı xilas olunub. Hadisədən sonra şəxsin səhhətinin normallaşdığı bildirilib.
Yaşananlar restoranın təhlükəsizlik kamerası tərəfindən də qeydə alınıb. Kadrlarda rəisin saniyələr içində vəziyyətə müdaxilə etdiyi və mümkün faciənin qarşısını aldığı aydın görünür.
Hadisə sosial şəbəkələrdə və yerli ictimaiyyətdə polis əməkdaşının nümunəvi davranışı kimi dəyərləndirilib.
