Sinqapurda 19 yaşlı qadın duş qəbul edərkən hamamın pəncərəsindən uzadılan telefonla gizlicə çəkildiyini görüb. Araşdırma zamanı 20 yaşlı şübhəlinin qadının 55 yaşlı anasını da əvvəlcədən gizli lentə aldığı və telefonunda 10 video saxladığı üzə çıxıb.
Referans Media xəbər verir ki, hadisə aprelin 8-də baş verib. Məlumata görə, şübhəli hamamın pəncərəsindən telefonunu içəri uzadaraq qadını çəkib. Gənc qadının qışqırmasından sonra hadisə yerindən qaçıb. Onun anası isə polisə məlumat verib.
Polis araşdırması zamanı şübhəlinin martın 22-də qadının anasını, martın 30-dan aprelin 8-dək isə gənc qadını müxtəlif vaxtlarda gizlicə lentə aldığı müəyyən edilib. Telefonunda duş qəbul etmə, paltar dəyişmə və tualetdən istifadə anlarını əks etdirən 10 video aşkarlanıb.
Məhkəmədə hadisənin gənc qadının psixoloji vəziyyətinə mənfi təsir göstərdiyi bildirilib. O, yaşadığı evdə özünü əvvəlki kimi təhlükəsiz hiss etmir. Ailə hadisədən sonra hamamın pəncərəsinin bağlı olduğuna xüsusi diqqət yetirməyə başlayıb.
20 yaşlı təqsirləndirilən şəxs oktyabrın 27-də məhkəmədə iki gizli çəkiliş ittihamını qəbul edib. Üçüncü ittihamın da cəza müəyyən edilərkən nəzərə alınacağı bildirilib. Zərərçəkənlərin kimliyinin qorunması üçün nəşr qadağası tətbiq olunub. Hökmün elan ediləcəyi məhkəmə iclası dekabrın 17-nə təyin edilib.
