COP31 Dünya İqlim Zirvəsinə geri sayım başladı. 9-20 noyabr tarixlərində Türkiyənin Antalya şəhərində keçiriləcək zirvə görüşündən əvvəl hazırlıqlar sürətlənir. Nəqliyyat, təhlükəsizlik və texniki infrastruktur işləri davam edərkən, dünyanın hər yerindən minlərlə iştirakçının Antalyada toplaşacağı gözlənilir.
Referans MEDİA xəbər verir ki, Birləşmiş Millətlər Təşkilatının İqlim Dəyişikliyi üzrə Çərçivə Konvensiyası çərçivəsində təşkil olunan COP31 qlobal iqlim siyasətlərinin müzakirə olunacağı ən vacib tədbirlərdən biri olacaq.
Zirvə toplantısında dövlət və hökumət başçıları, nazirlər, elm adamları, biznes nümayəndələri və vətəndaş cəmiyyəti təşkilatları iqlim böhranı ilə mübarizə siyasətlərini və həll yollarını qiymətləndirəcəklər.
Sammitin əsas mərkəzi kimi təyin olunmuş Antalya EXPO Sahəsində işlər davam edir. Təxminən 1 milyon kvadrat metrlik ərazi Mavi Zona və Yaşıl Zona kimi planlaşdırılıb. Mavi Zonada beynəlxalq təşkilatların rəsmi danışıqları və görüşləri keçiriləcək. Yaşıl Zona iş dünyasını, akademik dairələri, gəncləri və vətəndaş cəmiyyətini bir araya gətirəcək.
