Türkiyədə siyasi gündəmi dəyişdirən iddialardan biri ilə bağlı yeni açıqlama gəlib. Cümhuriyyət Xalq Partiyasından (CHP) istefa verdikdən sonra Yeni Partiyanın sədri Özgür Özələ dəstəyini açıqlayan Sakarya millət vəkili Ümit Dikbayır hakim Ədalət və İnkişaf Partiyasına (AK Parti) qoşulacağı ilə bağlı iddiaları təsdiqləyib.
Dikbayır bildirib ki, CHP-dən istefasından sonra AK Partinin Konya millət vəkili Ünal Karaman onunla əlaqə saxlayaraq Prezident Rəcəb Tayyib Ərdoğanın görüşmək istədiyini çatdırıb. O, dəvəti qəbul edərək Ankaradakı Prezident Kompleksinə gedib və Ərdoğanla görüşüb.
Referans Media xəbər verir ki, Dikbayır görüş zamanı Ərdoğanın onu AK Partiyaya qoşulmağa dəvət etdiyini bildirib. Millət vəkili isə bu qərarı təkbaşına verə bilməyəcəyini, ailəsi, uzun illər birlikdə çalışdığı siyasi yol yoldaşları və komandası ilə məsləhətləşməli olduğunu deyib.
Onun sözlərinə görə, qarşılıqlı müzakirələrin müsbət nəticələnəcəyi təqdirdə avqustun 14-də AK Partiyaya keçid məsələsinin gündəmə gətirilməsi də müzakirə olunub.
Dikbayır qeyd edib ki, Ərdoğanla görüşdən sonra hələ yekun qərar verməyib. O, əsas məqsədinin ölkəyə və millətə harada daha çox fayda verə biləcəyini müəyyənləşdirmək olduğunu vurğulayıb.
Millət vəkili görüş barədə məlumatların ictimaiyyətə sızmasından sonra onun AK Partiyaya keçidinin artıq rəsmiləşdiyi barədə təsəvvür yarandığını bildirib.
Dikbayır bu vəziyyətdə görüşü inkar edə bilməyəcəyini söyləyib: “Çünki görüş baş vermişdi və cənab Prezidentin dəvəti olmuşdu. Baş vermiş bir görüşü olmamış kimi göstərmək mənə yaraşmazdı. Lakin bunu təkzib etməyəndə də hələ vermədiyim qərarın sahibi kimi insanların qarşısına çıxdım”.
Dikbayır proseslə bağlı ona sərt reaksiya göstərən vətəndaşları da başa düşdüyünü deyib. O, illərdir özünü müəyyən siyasi mövqedə tanıyan insanların AK Partiyaya keçid iddialarından təəccüblənməsinin və narazı qalmasının təbii olduğunu bildirib.
Millət vəkili bəzi məsələləri daha əvvəl və daha açıq şəkildə izah etməli olduğunu etiraf edib. O, ictimaiyyət qarşısında kommunikasiya baxımından səhv etdiyini də vurğulayıb.
“Mənə qəzəblənən insanları başa düşürəm, onlar çox haqlıdır. İllərdir məni müəyyən siyasi xəttdə tanıyan, mübarizəmi izləyən insanların belə bir xəbər qarşısında təəccüblənməsi, inciməsi və hətta mənə qəzəblənməsi başadüşüləndir”, – deyə Dikbayır bildirib.
Dikbayır daha sonra AK Partiyaya qoşulması ilə bağlı prosesin dayandırıldığı barədə ona çatan məlumatlardan da danışıb.
Onun sözlərinə görə, əvvəllər birlikdə siyasət etdiyi başqa bir siyasi partiyanın sədri Prezident Ərdoğanla əlaqə saxlayaraq onun AK Partiyaya qoşulmasına etiraz edib. Bunun nəticəsində də prosesin başa çatdığı barədə məlumatlar yayılıb.
Lakin Dikbayır bu məlumatların nə dərəcədə doğru olduğunu bilmədiyini deyib.
Sakarya millət vəkili siyasi mövqeyinin dəyişmədiyini də xüsusi vurğulayıb. O bildirib ki, siyasətə başladığı gündən Atatürkün, Cümhuriyyətin və inandığı dəyərlərin tərəfdarı olub və bundan sonra da bu prinsiplərindən geri çəkilməyəcək.
Dikbayır Ərdoğanın onu Külliyədə qəbul etməsini isə siyasi mövqedən daha çox nəzakət məsələsi kimi qiymətləndirib.
“Cənab Prezident məni dəvət etdi, Külliyədə qəbul etdi, fikirlərimi dinlədi və görüşümüz boyunca son dərəcə nəzakətli münasibət göstərdi. Bunu deməyim mənim üçün siyasi mövqe məsələsi deyil, nəzakət məsələsidir”, – deyə o bildirib.
Dikbayır çıxışının sonunda bundan sonra da doğru bildiklərini söyləməyə davam edəcəyini və yanlış hesab etdiyi məsələləri ölkənin və xalqın mənafeyi naminə tənqid edəcəyini açıqlayıb.
O, haqqında müxtəlif iddiaların səsləndirildiyini qeyd edərək, məqsədinin yalnız yaşadığı prosesi olduğu kimi ictimaiyyətə çatdırmaq olduğunu bildirib.
