Gənclər və İdman Nazirliyinin 2025-ci ilin yekununa həsr edilmiş bayram tədbirinə ölkənin tanınmış və tanınmamış idmançıları, nazirliyin işçiləri, müğənnilər, hətta blogerlər dəvət olunublar.
Amma dəfələrlə dünya və Avropa çempionu, Olimpiya Oyunlarının finalçısı, müxtəlif mötəbər yarışların mükafatçısı Rafael Ağayev çağırılmayıb. Görəsən gənclər və idman naziri Fərid Qayıbov müəyyən tədbirə qonaq dəvət edəndə hansı meyarları əsas tutur? Rafael Ağayev kimi peşəkar, təcrübəli karateçini gözdən uzaqda saxlamaqda niyyəti nədir?
Məntiqə əsaslansaq, yekun yığıncağına il ərzində yüksək nəticə göstərən gənclər və idmançılar çağırılmalıdır. Reytinqə baxsaq, Rafael Ağayev hazırda dünyada tanınan Azərbaycan idmançıları sırasında öndə dayananlardan biridir. O, karateni yaradan xalqa mənsub olmasa da, bu idman növünün əfsanələrindən biri hesab edilir. Təsadüfi deyil ki, Dünya Karate Federasiyasının (WKF) prezidenti Antonio Espinos ona “karatenin brilliantı” ləqəbini verib. Elə WKF-nin rəsmi instaqram səhifəsində bu günlərdə Rafael Ağayevlə bağlı post paylaşılıb, onun nailiyyətlərindən bəhs olunub. Cənab nazir buna nə deyəcək? “Qara siyahı”ya saldığı idmançını Dünya Karate Federasiyası əfsanə adlandıraraq bütün aləmə təbliğ edir. Amma Gənclər və İdman Nazirliyi onu tədbirlərə çağırmağı lazım bilmir. Çünki özünə qarşı baş verən haqsızlıqlara etirazını bildirib şikayət etmişdi. Yəqin tərif yağdırsa, belə olmazdı…
Yaxşı olardı ki, Fərid Qayıbov yola salmaqda olduğumuz ilin başlanğıcında azad edilmiş müavini-Marianna Vasilevanın Azərbaycanda idmana vurduğu zərbən yada salardı. Xatırladım ki, Fərid müəllimin rəğbət bəslədiyi, haqqında həmişə ağızdolusu danışdığı Marianna xanımın sayəsində 2024-cü il dekabrın 31-də Gimnastika Etikası Fondunun (GEF) İntizam Komissiyası Azərbaycan Gimnastika Federasiyasını (AGF) Beynəlxalq Gimnastika Federasiyasının (FIG) himayəsi altında keçirilən tədbirlərdə iştirakdan 180 gün kənarlaşdırmışdı. Buna səbəb Azərbaycan milli komandasının sabiq baş məşqçisi, həmin vaxt gənclər və idman nazirinin müavini olan Mariana Vasilevanın idmançılara qarşı fiziki zorakılıqda ittiham edilməsi idi. Onun özü isə ömürlük diskvalifikasiya edilib. Bundan sonra Marianna Vasileva nazir müavini vəzifəsindən azad edildi. Lakin Fərid Qayıbovun elə həmin gün Mariana Vasileva ilə selfi çəkdirib öz sosial şəbəkələrində paylaşmağının, işdən çıxarılmış Vasilevanın nazirlikdə vətəndaş qəbulunda iştirakını təmin edərək dövlət səviyyəli tədbirə aparmağının sirrini, bununla onun nə demək istədiyini bu günə kimi də heç kim bilmədi. Bəlkə hörmətli cənab Fərid Qayıbov 2026-cı ilə kimi bu sirrin üstünü açsın, biz də bilək.
Sima Babayeva
