Atom Enerjisi üzrə Beynəlxalq Agentlik İsrail və ABŞ tərəfindən İranın nüvə obyektlərinə edilən hücumların qonşu ölkələrə heç bir radiasiya təsiri yaratmadığını bildirib.
Referans xəbər verir ki, bu barədə təşkilatın baş direktoru Rafael Qrossi MAQATE-nin rəsmi saytında yayımlanan açıqlamasında qeyd edib.
“Mövcud məlumatlara əsaslanaraq, MAQATE əminliklə bildirir ki, hücumlar nəticəsində ətraf ölkələrdə əhali və ətraf mühit üçün heç bir radiasiya təsiri qeydə alınmayıb. Bu, nüvə təhlükəsizliyi baxımından xüsusilə vacibdir. İranın tədqiqat və enerji reaktorları hücumlara məruz qalmayıb”, – açıqlamada bildirilir.
Xatırladaq ki, İsrail iyunun 13-nə keçən gecə İrana qarşı hərbi əməliyyata başlayıb. Bundan təxminən bir sutka sonra İran cavab zərbəsi endirib. Ardınca bir neçə gün qarşılıqlı hücumlar davam edib.
ABŞ isə gərginliyin artmasından 9 gün sonra – iyunun 22-nə keçən gecə İranın Fordo, Natanz və İsfahan şəhərlərindəki üç nüvə obyektini bombalayıb./Globalinfo.az
