Xəbər verdiyimiz kimi, apteklərdə xüsusilə ürək xəstələri üçün həyati əhəmiyyət daşıyan “Varfarin” dərmanının tapılmaması bir çox insanı çıxılmaz vəziyyətdə qoyduğu üçün redaksiyamıza bununla bağlı çoxsaylı şikayətlər daxil olub.
Məsələ ilə bağlı Analitik Ekspertiza Mərkəzindən (AEM) verilən açıqlamada bildirilib ki, dərmanların idxalı yalnız özəl şirkətlərin səlahiyyətindədir və “Varfarinlə” bağlı “STADA Azerbaycan” məhdud məsuliyyətli cəmiyyətinin sonuncu müraciəti 2024-cü ilin iyul ayında daxil olub.
Həmin şirkətin nümayəndələri isə deyirlər ki, dərmanın gətirilməsi üçün nazirliyə müraciət ediblər, lakin cavab mənfi olub. Şirkət icazə verildiyi halda “Varfarin”i ölkəyə gətirməyə hazır olduqlarını bildirib:
“Kardioloji xəstəliklər üzrə həyati əhəmiyyət daşıyan preparat kimi — ölkəyə birdəfəlik idxalının təmin edilməsi məqsədilə Analitik Ekspertiza Mərkəzinə müraciət olunub, lakin müraciətimizə mənfi cavab verilib. AEM icazə verdiyi təqdirdə, 50 000 ədəd Varfarin STADA 2,5 mq №50 tablet məhsulunun birdəfəlik idxalını həyata keçirməyə tam hazırıq”.
Şirkətin iddialarına nazirlikdən cavab
Şirkətin “Varfarin” qıtlığına səbəbi kimi Səhiyyə Nazirliyini günahlandırması məsələsi ilə bağlı da AEM açıqlama verib.
Qurum tərəfindən bildirilib ki, “STADA Azerbaycan” məhdud məsuliyyətli cəmiyyəti tərəfindən Analitik Ekspertiza Mərkəzinə 11 fevral tarixində göndərilən ilk müraciətə baxılmış və onlara yararlılıq müddəti 5 il olan varfarin dərman vasitəsinin idxalına icazə verilməməsinin səbəbi mart ayında verilən cavabda geniş izah edilib.
“Məlumat üçün bildirilib ki, “Dərman vasitələri haqqında” Azərbaycan Respublikasının Qanununun 9-1.16.2. bəndinə əsasən idxal olunan dərman vasitələri (dövlət qeydiyyatı məqsədilə idxal edilən, sərgidə nümayiş etdirilmək üçün nəzərdə tutulan, nadir hallarda rast gəlinən və spesifik müalicə tələb edən xəstəliklərin müalicəsi üçün nəzərdə tutulan dərman vasitələri istisna olmaqla) dövlət reyestrinə daxil edilmədikdə və ya dərman vasitələrinin idxalına icazə verilənədək dövlət qeydiyyatının qüvvədə olma müddəti bitdikdə dərman vasitələrinin idxalına icazənin verilməsindən imtina edilir.
Əlavə olaraq “Dərman vasitələrinin ekspertizasının aparılması Qaydası”nın təsdiq edilməsi haqqında Azərbaycan Respublikasının Nazirlər Kabinetinin 25 dekabr 2019-cu il tarixli 502 №-li qərarının 6.10. bəndində qeyd olunanlara əsasən, dərman vasitələrinin qeydiyyat sənədlərində edilən 1A tip dəyişikliklərin tətbiqinə 12 (on iki) aydan gec olmayaraq başlanılır.
Lakin bu qayda dərman vasitələrinin dövlət qeydiyyatı ilə bağlı digər (1B tip, II tip, yenidən qeydiyyat) hallara şamil olunmur. Hazırda, adı qeyd edilən dərman vasitəsinin (Varfarin Stada 2,5 mq N250) öncəki qeydiyyat vəsiqəsinin qüvvədə olma müddətinin 01.10.2024-cü il tarixdə bitdiyini, eləcə da davam etməkdə olan yenidən qeydiyyat prosesi üzrə verilmiş 03.03.2025-ci il tarixli 27561/24 nömrəli Ekspertiza rəyində sözügedən dərman vasitəsinin yararlılıq müddətinin 3 il olaraq qiymətləndirildiyini nəzərə alaraq, onun əvvəlki qeydiyyat vəsiqəsinə uyğun olaraq istehsal edilmiş partiyalarının idxalı məqsədəuyğun hesab edilmir”.
O da qeyd edilib ki, şirkətin apelyasiya məktubuna cavab hazırlanır:
“Bəri başdan qeyd edirik ki, artıq bu dərman vasitəsi aprelin 7-də yeni qeydiyyat vəsiqəsi almış və yararlılıq müddəti 3 il olan Varfarin dərman vasitəsi istənilən qədər idxal edilə bilər. Varfarin stada dərman vasitəsi 07.04.2025-ci ildə DV №25-00442 nömrəli yeni qeydiyyat vəsiqəsi alıb hansı ki, burada onun yararlılıq müddəti ekspertiza rəyinə əsasən 3 il olaraq qeyd edilib”.
