İspaniya La Liqasının IX turunda “Real Madrid” doğma meydanda “Sevilya”nı 4:1 hesabı ilə məğlub edib. Madrid təmsilçisinin qələbəsində Türkiyə millisinin üzvü Arda Gülər də vurduğu baxımlı qolla diqqət çəkib.
Referans Media xəbər verir ki, “Santyaqo Bernabeu” stadionunda keçirilən qarşılaşmada Arda Gülər 30-cu dəqiqədə cərimə meydançasının qarşısından dəqiq zərbə ilə rəqib qapısına yol tapıb. Gənc futbolçu bu qolla komandasını hesabda önə keçirib və azarkeşlərin alqışını qazanıb.
“Real Madrid”in digər qollarını Kilian Mbappe 37-ci və 63-cü dəqiqələrdə, Yan Diomande isə 82-ci dəqiqədə vurub. “Sevilya”nın yeganə qoluna 80-ci dəqiqədə Manu Bueno imza atıb.
Beləliklə, “Real Madrid” doğma meydanda inamlı qələbə qazanaraq hesabına üç xal yazdırıb.
Madrid təmsilçisini qarşıdakı turda daha bir prinsipial qarşılaşma gözləyir. “Real Madrid” növbəti oyunda səfərdə əzəli rəqibi “Barselona” ilə üz-üzə gələcək. “El-Klasiko” adlanan bu görüş futbolsevərlərin böyük marağına səbəb olacaq.
