ABŞ-nin Pensilvaniya ştatında bir ev sahibinin Hellouin bayramı üçün həyətində hazırladığı qorxunc dekorasiyalar ciddi narazılığa səbəb olub. Ağacdan asılan, qara torbalara bükülmüş insan cəsədini xatırladan beş maket yerli sakinlərin etirazına səbəb olub. Onlar görüntülərin ölkənin keçmişində qaradərililərə qarşı törədilmiş irqçi linç hadisələrini xatırlatdığını bildirərək dekorasiyaların yığışdırılmasını tələb ediblər.
Referans Media xəbər verir ki, Pensilvaniya ştatının Bakks dairəsində yerləşən Bristol qəsəbəsində yaşayan ev sahibi oktyabrın 31-də qeyd olunan Hellouin bayramı öncəsi həyətini qorxu mövzulu bəzəklərlə bəzəyib. Lakin ağacın budaqlarından asılan, qara torbalara bükülmüş və lentlərlə örtülmüş insan bədəni formasındakı beş maket birmənalı qarşılanmayıb.
Bəzi sakinlər bu görüntülərin ABŞ tarixində qaradərililərə qarşı həyata keçirilmiş irqçi zorakılığı, xüsusilə də linç hadisələrini xatırlatdığını bildiriblər. Məhəllə sakinlərindən Roşea Nyukirk gördüyü mənzərəyə etiraz edərək ev sahibinin bu dekorasiyaların yaratdığı təsiri anlamamasına təəccübləndiyini bildirib.
Narazılıqdan sonra ABŞ-də qaradərililərin hüquqlarını müdafiə edən Rəngli İnsanların İnkişafı üzrə Milli Assosiasiyanın (NAACP) Bakks dairəsi üzrə bölməsi də məsələyə münasibət bildirib. Təşkilat nümayəndələri ağacdan asılmış cəsədəbənzər maketlərin ölkənin irqçi linç tarixini xatırlatdığını və bu səbəbdən ağrılı məna daşıdığını vurğulayaraq onların götürülməsinə çağırıblar.
Ev sahibi isə bəzəkləri internetdən hazır dəst şəklində aldığını və heç kimi narahat etmək niyyətinin olmadığını bildirib. O, Hellouin bayramında qorxulu dekorasiyaların adi hal olduğunu əsas gətirərək maketləri götürməkdən imtina edib. Məsələ Bristol Bələdiyyə Şurasının da gündəminə çıxarılıb. Şikayətlərdən sonra rəsmilər ev sahibi ilə danışaraq dekorasiyaları yığışdırmağa razı salmağa çalışıblar. Lakin nəticə əldə olunmayıb. Bələdiyyə nümayəndələri bu cür bəzəkləri qadağan edən yerli qaydanın olmadığını və buna görə ev sahibini onları götürməyə məcbur edə bilmədiklərini bildiriblər.
Hadisə sakinlər arasında fikir ayrılığı yaradıb. Bəziləri dekorasiyaların tarixi və irqi baxımdan həssas məqamları nəzərə almadığını düşünür, digərləri isə məsələnin həddindən artıq böyüdüldüyünü müdafiə edirlər. Məhəllə sakinlərindən Mayk Ueyd Hellouin bayramında qorxulu bəzəklərdən istifadənin geniş yayıldığını deyərək öz evində də skeletlərdən və cəsədəbənzər maketlərdən istifadə etdiyini bildirib.
NAACP isə mübahisənin Hellouin bayramına mane olmaqla əlaqəli olmadığını vurğulayıb. Təşkilat ABŞ tarixində qaradərililərin ağaclardan asılaraq öldürülməsi kimi hadisələrin dərin ictimai yaralar buraxdığını xatırladaraq belə görüntülərin tarixi kontekstdən ayrı qiymətləndirilməməli olduğunu qeyd edib. Məlumata görə, bütün etirazlara baxmayaraq, mübahisəli dekorasiyalar həftəsonu da həyətdə qalmaqda davam edib. Hadisə ifadə azadlığı ilə ictimai həssaslıq arasındakı sərhədlərlə bağlı müzakirələri yenidən gündəmə gətirib.
