Azərbaycan Mərkəzi Bankı xəbər verir ki, bu il iyulun 1-nə Azərbaycanda vaxtı keçmiş kreditlərin məbləği 719,4 milyon manat təşkil edib.
Bu, iyunun 1-i ilə müqayisədə 13,2 % çoxdur.
Ölkədə problemli kreditlərin məbləği ilin əvvəlinə nisbətən 37,1 %, son 1 ildə isə 36,4 % artıb.
İyunun sonuna vaxtı keçmiş kreditlərin ümumi kredit portfelində xüsusi çəkisi 2,1 % təşkil edib. Bu nisbət mayın sonuna da 1,9 %, ötən ilin sonuna 1,6 %, ötən il iyunun sonuna isə 1,7 % olub.
Bəs problemli kreditlərin həcminin artması hansı çətinliklər yarada bilər?
Referans Media bildirir ki, mövzu ilə bağlı Bizim.Media-ya danışan iqtisadçı Əkrəm Həsənov deyir ki, bütün hallarda bu xoş mənzərə deyil:
“Biz bunun bir dəfə acı nəticəsini yaşamışıq. On il qabaq həm devalvasiya, həm də problemli kreditlərin həcminin kəskin artması 20-yə qədər bankın sonunu gətirdi. Eyni zamanda, vətəndaşlar da böyük ölçüdə zərər gördü. Doğrudur, indiki mənzərə o zamankı ilə eyni həddə deyil. Amma bununla belə reallıq bəzi banklar üçün ciddi siqnal olmalıdır. Ona görə də bəzi banklar ehtiyatlı olmalıdırlar”.
