İranın ali dini lideri Ali Khameneinin hərbi məsələlər üzrə müşaviri Möhsün Rzayi ABŞ-ın İrana qarşı yeni hücumlar həyata keçirəcəyi təqdirdə sərt cavab veriləcəyini bəyan edib.
Referans MEDİA xəbər verir ki, Rzayi sosial şəbəkədə paylaşdığı açıqlamada bildirib ki, ABŞ tərəfindən atılan hər bir addım raket və pilotsuz uçuş aparatlarının kütləvi hücumu ilə qarşılanacaq.
“İstənilən atəş və hər bir hücum raket və dron seli ilə cavablandırılacaq. Təcavüzkar tərəf dərhal cəzalandırılacaq”, – deyə o vurğulayıb.
Açıqlama ABŞ-ın İran tankerinə və Qəşm adasına zərbələr endirməsindən sonra səsləndirilib. Məlumata görə, bu hücumların ardınca İran tərəfindən Küveyt və Bəhreyn istiqamətində cavab zərbələri həyata keçirilib.
Hökümətə yaxın İran xəbər agentliklərinin yaydığı məlumatlarda bildirilir ki, Tehran ABŞ və İsraillə davam edən müharibə fonunda atəşkəsin uzadılması ilə bağlı vasitəçilərlə əlaqələri dayandırıb.
Regional rəsmilərdən birinin sözlərinə görə, İran danışıqlara qayıtmazdan əvvəl Livanda əldə olunan atəşkəsin tam şəkildə icra edilməsini tələb edir.
Bununla yanaşı, ABŞ Prezidenti Donald Tramp bu iddiaları təkzib edərək Vaşinqton və Tehran arasında danışıqların davam etdiyini bildirib.
Son açıqlamalar regionda gərginliyin yenidən artdığı və tərəflər arasında diplomatik səylərin gələcəyinin qeyri-müəyyən qaldığı bir dövrdə səsləndirilib.
