ABŞ ilə İran arasında gərginlik sürətlə artır. ABŞ qüvvələrinin İran bayrağı altında üzən “Touska” adlı yük gəmisinə müdaxilə etməsindən sonra İran tərəfindən cavab addımı atıldığı bildirilir.
Referans Media xəbər verir ki, İranın yarırəsmi Tasnim Xəbər Agentliyinin məlumatına görə, İran Silahlı Qüvvələri ABŞ-a məxsus bəzi döyüş gəmilərinə pilotsuz uçuş aparatları (PUA) ilə hücum təşkil edib.
Məlumata görə, insident ABŞ qüvvələrinin İran bayraqlı “Touska” adlı yük gəmisini dayandırmaq üçün ona atəş açmasından sonra baş verib. Bildirilir ki, ABŞ donanması gəminin mühərrik bölməsini hədəf alaraq onu hərəkətsiz vəziyyətə salıb və nəzarətə götürüb.
Vaşinqton bu addımın gəminin edilən xəbərdarlıqlara məhəl qoymaması səbəbindən atıldığını iddia edir. Tehran isə bu müdaxiləni “qanunsuz addım” kimi qiymətləndirərək cavab verəcəyini bəyan etmişdi.
İran mediası hücumların yalnız PUA-larla məhdudlaşmadığını, bəzi ABŞ hərbi obyektlərinin də hədəf alındığını irəli sürür. Bölgədə daha əvvəl də İranın ABŞ hərbi bazaları və gəmilərinə raket və ya dron hücumları təşkil etdiyi iddiaları gündəmə gəlmişdi.
Ekspertlərin fikrincə, bu hücumlar tərəflər arasında “nəzarətli eskalasiya” strategiyasının bir hissəsi ola bilər.
ABŞ Prezidenti Donald Tramp isə açıqlamasında insidenti təsdiqləyərək bildirib ki, İranlı ekipaj xəbərdarlıqlara əməl etmədiyi üçün ABŞ donanması gəmini dayandırmaq üçün atəş açıb.
Trampın sözlərinə görə, hazırda gəmi Amerika Birləşmiş Ştatları Dəniz Piyadaları Korpusu tərəfindən nəzarət altında saxlanılır.
Son həftələrdə ABŞ-ın İranın hərbi obyektlərinə qarşı əməliyyatlarını artırdığı, İranın isə buna dron və raket hücumları ilə cavab verdiyi bildirilir.
Xüsusilə Hörmüz boğazı və ətrafında baş verən hadisələrin qlobal enerji bazarları və beynəlxalq təhlükəsizlik üçün ciddi risk yaratdığı vurğulanır.
Mütəxəssislər tərəflər arasında birbaşa hərbi toqquşma ehtimalının artmasının regionda yeni genişmiqyaslı münaqişə riskini yüksəltdiyini bildirirlər.
