Dünyanın müxtəlif ölkələrində bank hesablarına kiberhücumlar həyata keçirilib. Son hadisələr nəticəsində milyonlarla dollar vəsaitin oğurlandığı, yüz minlərlə müştərinin məlumatlarının ələ keçirildiyi bildirilir. Tayvan, Cənubi Koreya, Fransa və digər ölkələrdə qeydə alınan insidentlər bank sistemlərinin təhlükəsizliyi ilə bağlı ciddi narahatlıq yaradıb.
Referans Media xəbər verir ki, kibercinayətkarlar təkcə bank müştərilərinin hesablarını deyil, maliyyə qurumlarının əməkdaşlıq etdiyi xidmət təminatçılarının sistemlərini də hədəfə alırlar.
Tayvanda yüzlərlə bank hesabından pul çıxarılıb
Tayvanda "SinoPac Bank"ın mobil bankçılıq sisteminə edilən kiberhücum nəticəsində 419 müştərinin hesabından icazəsiz olaraq 427 əməliyyat aparılıb. Nəticədə ümumilikdə 41,76 milyon Tayvan dolları, yəni təxminən 1,3 milyon ABŞ dolları başqa hesaba köçürülüb. Bankın açıqlamasına görə, hücum edənlər mobil bankçılıq sisteminə xidmət göstərən təchizatçıların təhlükəsizlik boşluqlarından yararlanıblar. Şübhəli köçürmələrin həyata keçirildiyi hesab dondurulub, zərərçəkən müştərilərin itkilərinin qarşılandığı bildirilib.
Cənubi Koreyada 37 maliyyə qurumu hədəfə alınıb
Cənubi Koreyada sentyabrın 30-dan noyabrın 3-dək 37 maliyyə qurumunda ümumilikdə 40 kibertəhlükəsizlik insidenti qeydə alınıb. Hücumlar nəticəsində təxminən 473 min məlumat qeydinin sızdırıldığı, bəzi maliyyə təşkilatlarından isə 1 milyard von dəyərində vəsaitin oğurlandığı açıqlanıb. Hadisələrdən sonra ölkədə təxminən 580 maliyyə qurumunun təhlükəsizlik sistemlərinin yoxlanılması qərara alınıb.
Fransada 133 milyon dollarlıq hücum iddiası
Fransanın böyük bank qruplarından olan "Crédit Mutuel Arkéa" da kiberhücuma məruz qaldığını təsdiqləyib. Hücum edənlərin bankın xidmət aldığı şirkətlərdən birinin platforması vasitəsilə sistemə daxil olaraq müxtəlif maliyyə qurumlarına pul köçürmələri həyata keçirdiyi bildirilir. Hadisə nəticəsində təxminən 133 milyon dolların hədəfə alındığı iddia edilsə də, bank bu məbləği təsdiqlənmiş itki kimi qəbul etməyib. Müştəri hesablarına girişin olmadığını və onların vəsaitlərinin təhlükəsizliyinin qorunduğunu açıqlayıb.
Braziliyada kiberhücumların sayı rekord həddə çatıb
Braziliya Mərkəzi Bankının məlumatına görə, 2026-cı ilin ilk doqquz ayında maliyyə sektorunda 99 kibertəhlükəsizlik insidenti qeydə alınıb. Onlardan 68-i dələduzluq hadisəsi kimi təsnif edilib. Beləliklə, cəmi doqquz ay ərzində 2025-ci ilin bütöv ili üzrə qeydə alınan 76 hadisəlik göstərici geridə qalıb.
İndoneziyada 6 mindən çox hesab hədəfə alınıb
İndoneziyanın Bank Jambi bankına qarşı həyata keçirilən hücum zamanı 6609 müştərinin hesabı hədəfə alınıb. Təxminən 144,82 milyard İndoneziya rupisi dəyərində vəsait hücum edənlərin nəzarətində olan hesablara köçürülüb və daha sonra kriptovalyutaya çevrilib. Polis hadisə ilə əlaqəli üç şübhəlinin saxlanıldığını, təxminən 18,94 milyard rupilik aktivin müsadirə edildiyini açıqlayıb.
Sinqapurda 12,8 milyon dollarlıq dələduzluq
Sinqapurda fəaliyyət göstərən neft-kimya şirkəti saxta ödəniş təlimatları nəticəsində 12,8 milyon dollarını Kambocadakı hesaba köçürüb. Araşdırma zamanı dələduzların saxta imza və möhürdən istifadə edərək şirkəti aldadıqları müəyyən edilib. Sonradan polis və bankın birgə fəaliyyəti nəticəsində vəsaitin hamısının geri qaytarıldığı bildirilib.
Yaponiyada saxta bank zəngləri ilə milyonlar oğurlanıb
Yaponiyanın Yamaqata bölgəsində bank əməkdaşı kimi təqdim olunan şəxslərin şirkətləri saxta internet bankçılığı səhifələrinə yönləndirərək təxminən 912 milyon yen oğurladığı üzə çıxıb. Araşdırmaya görə, cinayətkarlar şirkət əməkdaşlarının hesab məlumatlarını ələ keçirərək icazəsiz pul köçürmələri həyata keçiriblər.
Bank müştəriləri üçün hansı təhlükə var?
Müxtəlif ölkələrdə baş verən hadisələr maliyyə sektorunda kibertəhlükəsizlik risklərinin artdığını göstərir. Bununla belə, bütün insidentlər eyni hücum qrupunun fəaliyyəti ilə əlaqələndirilmir. Bəzi hallarda bank sistemlərinə birbaşa müdaxilə edildiyi halda, digər hadisələrdə saxta zənglər, elektron məktublar və oğurlanmış şəxsi məlumatlardan istifadə olunub.
Qeyd edək ki, bu hadisələr bankların kütləvi şəkildə bağlanması və ya müştərilərin əmanətlərinin müsadirə edilməsi anlamına gəlmir.
