"Fənərbaxça"da yeni mövsümə hazırlıq prosesi davam edərkən komanda daxilində gərginlik yaşandığına dair iddialar gündəmə gəlib. Məlumata görə, ispaniyalı ulduz futbolçu Marko Asensio baş məşqçi İsmayıl Qartalın bəzi qərarlarından narazı qalıb.
Referans Media xəbər verir ki, iddialara əsasən, Asensio narazılığını klubun futbol direktoru Oğuz Çetinə çatdırıb. Bildirilir ki, təcrübəli futbolçu komandadakı rolu və oyunlarda verilən qərarlarla bağlı narahatlığını rəhbərliyə ifadə edib.
Xəbərdə qeyd olunur ki, Asensio UEFA Çempionlar Liqasının II təsnifat mərhələsində "Qornik Zabrje" ilə keçirilən ilk oyuna ehtiyat oyunçular skamyasından başlamasından, cavab qarşılaşmasında isə əvəzlənməsindən narazı qalıb.
Məlumata görə, Oğuz Çətin futbolçunu sakitləşdirməyə çalışaraq, bu məsələlərin həll oluna biləcəyini bildirib və İsmayıl Qartalla danışacağını deyib.
Qeyd edək ki, Marko Asensio ötən mövsüm "Fənərbaxça"nın heyətində 38 rəsmi oyunda meydana çıxaraq 13 qol və 13 məhsuldar ötürmə ilə yadda qalıb. Hazırda transfer bazarındakı dəyəri 15 milyon avro qiymətləndirilən futbolçunun İstanbul klubu ilə müqaviləsi 2028-ci ilin yayına qədər qüvvədədir.
Xatırladaq ki, bu məlumatlar Türkiyə mətbuatında yer alan iddialara əsaslanır. Klub və ya tərəflər məsələ ilə bağlı hələlik rəsmi açıqlama verməyiblər.
