Rusiyanın Federal Təhlükəsizlik Xidməti (FSB) Qərb ölkələrinin Ukraynaya göndərdiyi silah və sursatların qanunsuz dövriyyəyə çıxaraq Meksikadakı narkokartellərin əlinə keçdiyini iddia edib.
Referans Media-nın xəbərinə görə, bu barədə FSB-nin qondarma Donetsk Xalq Respublikasındakı idarəsinin yaydığı videomaterialda bildirilib.
Videoda qeyd olunur ki, Ukraynaya göndərilən silahlar sonradan qeyri-qanuni bazara çıxarılır və müxtəlif cinayətkar qruplar tərəfindən əldə edilir.
“Bu silahlar qanunsuz bazara və cinayətkar qruplaşmaların əlinə keçir. Son nümunə isə Ukraynadan göndərilən silahların Meksika narkokartellərinin ixtiyarına keçməsidir”, – deyə videoda bildirilir.
FSB həmçinin bəyan edib ki, Rusiyada silah dövriyyəsinə ciddi nəzarət həyata keçirilir və bu sahədə sərt nəzarət mexanizmləri mövcuddur.
Qeyd edək ki, FSB-nin bu iddiaları ilə bağlı müstəqil mənbələr tərəfindən təsdiqlənmiş sübut təqdim edilməyib və xəbərdə yer alan məlumatlar Rusiya təhlükəsizlik qurumunun açıqlamasına əsaslanır.
